مستغربة؟!

إن الحياة برة حدودك مرعبة

ما هي دنيا متعبة 

مافهاش ملايكة وأنبيا

منتظرة ليه الأجوبة

مستغربة؟!

إن الأمان مش بالكلام 

أو حد مخلص مرة خان

وإن عادي الانتقام 

في دنيا كل ما فيها هان 

مستغربة؟!

ما هي دي حياة البشر 

فعادي خير قصاده شر

وعادي سكر يبقى مر 

وحد يئذي وهو حر 

تشوف وشه تقول ملاك 

لكنه من جواه هلاك 

يتمنى قربك بامتلاك 

وفجأة يزهق من هواك

مستغربة؟!

إن الضماير مترّبة 

أخلاق صفيح 

تلمع صحيح 

فيها مبادئ كركبة

منتظرة جني من فانوس

يكشف قصادك النفوس 

أصل الكلام من غير فلوس

فنعيش حياة ناخد دروس

مستغربة؟!

ما الابن عادي يئذي أبوه 

والأب ممكن يقتلوه 

وأخ عادي يخون أخوه

وحد ميت يغتالوه

والأم ممكن تبقى نار

في قلب ابن يعيش دمار

وأب يكذب ليل نهار

وبنت لكن تبقى عار

ولسه برضو مستغربة

بره حدودك مرعبة 

كل التجارب متعبة 

ومافيش نهائي أجوبة 

وهتفضلي مستغربة