وشوش الناس مابتخبيش
وشوش ضحكتها مابترويش
وشوش نظرتها مابتشفيش
وشوش تاخد... ومابتديش

وليه مصمم يشوف وشك
وشوش الناس وألوانها
وتفضل أنت وش حزين
هتشكي لمين؟

بضحكة حزينة محتارة
وغيرها كتيرة غدارة
وناس كلمتها مسمومة
وكذب بكلمة معسولة
فيه سم لحية ملعونة
تبخه في أرض مروية
فتطرح زرعة معطوبة
وتفضل هي في الصورة
بضحكة غدر منتظرة
للحظة نصر موشومة
بختم حروفه مطفية

عيون كارهاك
ومش بتقول
قلوب بيعاك
وتتمنى...
تبات مقتول
بتبكي ليالي على حلمك
فتطفي كل نور جواك
وتتلون كما قلوبهم
وتتحول كما ظنونهم
وتصبح صورة طبق الأصل
من إبليس كما عقولهم

وشوش بتحارب الأحلام
وغيرها تصيد في أي كلام
تشوف النظرة تتلخبط
تصدقها.... تكذبها
وبين إنك تآمنها
وبين إنك تآلمها
فتفضل عايش الأوهام

تقابل كل يوم احساس
وغيرة وحقد في الأنفاس
في كون كل اللي فيه كذاب
تصدق مين... مفيش أحباب
وليه يا عقل متلخبط
وليه ياقلب شاري رخيص
كفاية تكون بقلب عفيف
كفاية تعيش بوش نضيف

هتشكي لمين وشوش الناس؟
هتشكي لخالق الأنفاس
وتدعي بقلب فيه احساس
يارب اكفيني شر خسيس
وابعد عني أي وشوش
بعقل مريض وعين أبليس