أبويا عمره ما كان له بديل
كان قلب كبير طيب وكريم
وصفاء للروح أخلاق ونبيل
كان أب مثالي من الأساطير
كفاني حنان عيشني سنين
من بعد ما مات وأنا مكسورة
بسترجع طيفه اللي فارقني
من بدري ولا شافني عروسة

وتمر سنين وأكبر ومفيش
ولا شيء بيعوض كسرة بيت
غاب صاحبه ونسى يقفل بابه
ولا شيء بيحسس بأمان
لا في نومة ولا راحة بال
بعد ما غاب ولا عاد بيعود
مالشغل في معاد محدود

أبويا إداني في يوم وردة
لسة ريحتها أجمل ذكرى
حسسني يومها إني ملكة
قالي أشعار وغُنى وكلام
يبني جوايا الإنسان
أنا حتة حلم في أحلامه
زرعة غرسها ولسة بتكبر
بس بتكبر مش أدامه

وتلف الدنيا ومهما كبرت
في كسرة روح ولا تتعوض
في العمر مهما عجزت
في عيون الناس هفضل أدور
عن نظرة حب في عين الأب

أوعاك تستهون بالصورة
أو لقطة فيديو مهزوزة
هتكون اللقطة دي لابنك
أجمل ذكرى وشوق لسنين
هتخلي صورتك محفورة
في القلب وشيلاها العين

أوعاك تبخل تديه حنانك
تتردد تاخده في أحضانك
تعيش وياه لحظات فرحة
حتى لو ملياك أحزانك
حطها حلقة جوة ودانك
كله مفارق
وهيفضل منك كام ذكرى
وسيرة وابن بيبكي عشانك