شكراً ... حضرة المدير 

لما مديرك يظلمك 

ويستخدم سلطته ضدك 

تشتكى له ويحاول يقنعك 

ان القرار ده فى صالحك 

ينقلك بقرار من مكانك 

يراضى مرؤسيه على حسابك 

أترك الوساوس من دماغك 

ده لصالح العمل وحياتك 

حجج واهية فوق الوصف 

مش مصدق منها ولا حرف 

دى تصفية حسابات مش اكتر 

عمرى ما كنت فى الشغل يوم مقصر 

لكن تعمل إيه فى ضعاف النفوس 

كلامى تاعبهم عشان كلام محسوس 

ولسه ضميرهم فى الضلال مغموس 

دكتوراه في الرقص 

وعمياهم الفلوس 

الطيب يقولك يا عم مشى حالك 

وطى عشان الموجة تعدى من قدامك 

واللى عامل زى الحطب الناشف فى عيدانه 

تلاقيه من بعيد واقف 

ضحكته واصلة لحد ودانه 

زى ما تكون قتلته وأخدت منه ميراثه 

كلامى إحساس الناس 

والكل هنا عاشه وشافه 

زمالة العمل بتكون مابين 

طيب وأهطل ولئيم وكوهين 

أولهم سهل لكن الأخطر 

فيهم بيكون آخر أتنين 

لئيم الطبع ده ناكر جميل 

صفارة ضحكته ملمس تعابين 

أما كوهين ده حسابه 

 بأذن الله يكون حسابين 

بعيد عن الدستور والقوانين ونصوص اللوايح 

إحنا بنشخصن المواضيع 

كله عندنا سوايح 

لو فيه واسطه جامدة 

تلاقى الكلام مدايح 

أما لو كنت حاجة هامدة 

تلاقى تعليمات وفضايح 

المدير من حقه يقيلك من منصب أو يرقيك 

ده حسب مزاجه الشخصى 

أو حسب استلاطفه ليك 

وحسب حاشيته إللى حواليه 

وكلامهم اكيد له تأثير عليك 

مش مهم كمان الخبرة 

المهم هو تكوين رأيه فيك 

مساحين الجوخ لازم تقدم للمدير فروض الطاعة والولاء 

عشان يرضى عنهم 

ويكونوا أول الأسماء 

يشوفوه يروحوا يسلموا عليه ويظهر عليهم الأنحناء 

لو ضحك يضحكوا 

لو سكت يسكتوا 

لو اتكلم يقولوا كلامك ألحان وغناء 

قالوها كتير لكل إللى قبلك 

قالوا أنت هدية ربنا لنا من السماء 

ساعتها شافوا الدنيا حلوة 

وزى المطر نزلت عليهم المكافآت 

أما لو حصل العكس 

ولمح عندهم عزة نفس 

وعرق الكرامة بيه حس 

يبقى أتغضب عليهم 

وأتصبت اللعنات 

شكراً ... حضرة المدير 

ياترى ده تقدير 

وألا ... تكدير .