مش هى دى بلدنا
ولا هما دول ولادنا
ولا دى أبدا رايتنا
ولا هى دى حياتنا
فيه فجوة بعيدة خدتنا
وفى بحر موجه عالى حدفتنا
وتحتيه دوامه بلعتنا وسحبتنا
ومش عارفين نرجع تانى لطبيعتنا
إيه اللى حصل وإيه اللى بيحصل
ياترى إيه تانى مستخبى لنا
الأخلاق عندنا ضاعت
الأصول بينا تاهت
العادات والتقاليد شاخت
الدين عندنا بقى موضة ومواسم غابت
حتى الحروف الحلوة على الشفايف ماتت
غيرتوا كل الثوابت ......
الرجالة اتحنى ضهرها
قدام ولادها ومالت
الستات فى البيوت
عن عمايل الأكل تابت
الولاد إللى شعرها
لسه بينبت شابت
الناس ماشيه تكلم نفسها
وعلى الأيام عابت
كل شىء اتغير عندنا
إلا الخوف من بكره
هو بس إللى ثابت
بدلتوا كل شيء
خليتوا المتهم بريء
الناس بتطاطى راسها
وموافقة على أى شىء
الخوف بقى ميراثها
عمرك شوفت خوف جريء
جففتوا كل المنابع
خليتوا حياتنا مواجع
الحزن ساكن جوانا ومرابع
والفرح راح مننا ومش راجع .