زمان كنا صغيرين
عمرنا كان تلاته وعشرين
وكان معانا مسئولين
ضعف عمرنا ومحترمين
جايز تختلف معاهم
لكن كانوا بيحترمونا
دلوقتى كبرنا لكن
للأسف دول بيحبطونا
أزاى تقدر تنجح وتبدع
تحت أى ضغط
شايل منك الصلاحية
وكلامه إهمال وشخط
كأنه الحاكم بأمره
وما فيش حد قبله
وتكون ضعف عمره
وخايف أنك تضله
كل شويه هات الدفتر
وتعالى وقع قدامى
زى مانكون لسه
تلامذه فى ابتدائي
طب نكتب الرقم القومي
والاسم يكون ثلاثى
حاجات صغيرة لكن كفيله
إنها تحبطك فى ثوانى
واصحابنا إللى شغالين معاهم
ياترى بيقولوا لهم علينا إيه
والا المكافأة تقيلة ومسكاتهم
المهم ينولوا رضا سعادة البيه
عمرك شوفت أطفال بتضحك
لما تترمى فى حضن أمنا الغولة
إحنا بقى عندنا أصحابنا الكومبارس
بيلعبوا أدوار البطولة
عارفين ليه زمان
ماكانش عندنا عصافير
عشان كانوا المسئولين
بيقصوا ريشهم قبل ما يطير
وعندنا كمان مشكلة تانية
مرض أزدواج الشخصية
ناس عايشة بعدة شخصيات
معاك وعليك كلها تناقضات
دول عاوزين يروحوا النفسية
ومرة واحد صاحبي
اتصل على سعادة البيه
عنده مشكلة في شغله
عايز يعرف أزاى وليه
لكن سعادته أتصل بحد تانى
وقاله فلان ده عايز منى إيه
هو حضرتك مستكبر ترد عليه
والا فلان ده عايز منك
سلف الف جنيه !
الإدارة فن تعامل
وذكاء وخبرة سنين
مش شهادة جوه برواز
والاسم مسئولين
عشان تنجح مع الناس
تكون قريب منهم
تعرف مشاكلهم
تاخد منهم عينيهم
لكن تتكبر
وفاكر نفسك مسيطر
وتظلم من غير ما تفكر
مش هتلاقى السلام بايديهم
عشان تنجح مع الناس
شد وأرخى كل الحبال
جايز يكون التواصل صعب
عشان هناك فرق أجيال
لكن بالأحترام والتقدير
يدٌوب أى خلاف
ولو أد الجبال .
2
-2
