أصحاب الفيسبوك 

عندى أصحاب على الفيسبوك 

إللى بيتابع فى صمت 

وإللى بينقد فى صمت 

وإللى شايف إنك ظلمت 

لهم كل الأحترام والتقدير 

وإللى بيعمل لايك 

أو كومنت 

أكيد ده له عندي تأثير 

وياسلام لو خد كلامى 

وعجبه وعمل له شير 

وإللى بيجاملك من غير 

مايعرف إيه هو المكتوب 

لكن كلامه زى الحرير 

وإللى شايف كلامك 

وجواه حاجز لكن كبير 

مش عارف الفرق بين 

بكره ونكره 

لكن للأسف جواه بيغير 

زى ما يكون تار بايت 

المهم مايكونش ساكت 

عامل زى نبوت الغفير 

وإللى مش عايز يعمل كومنت 

آل خايف على شعور الغير 

حضرتك حسبتها أزاى 

ومين قالك أنه المقصود 

يا فاعل الخير !!

وإللى ياخد كلامك يطبعه 

ويبعته للسيد المدير 

مش كل الكلام إللى بكتبه 

بيكون دايما على العصافير 

وياسلام لما تيجى لك رسالة 

ويقولك ده آخر تحذير 

الكتابة بالنسبة لي حياة 

والبعد عنها موت أو تخدير 

أستغرب واضحك جوايا 

وأقول يا خسارة على الناس الفهيمة 

أنا كمان بكتب عن الحب 

وعن الهجر 

وكمان عن أبن اللئيمة 

وأحلى حاجة بسمعها 

لما يقعدوا يفكروا ويحللوا 

ياترى الكلام على مين النهاردة 

وعلى طول يقدروا يوصلوا 

شفت أزاى معانا ناس 

بتفهمها وهى طايرة !!

فيه ناس جاحدة على أهلها 

وعلى الفيس تلاقيهم حمل وديع 

كلامهم مع الناس زلطة بدبشها 

وعلى الفيس يتبدل 

الخريف ويبقى ربيع 

عايشين بوشين بين الناس 

وش فى الحقيقة صعب وصفه 

والوش التانى كله أحساس 

ذوق وأدب 

والعيب مش من طبعه 

كلنا عايزين دكتور نفسانى 

كلنا مرضى ...

إلا من رحم ربه .