كنت فاكر زمان
الناس كلها طيبة
كنت حاسس بأمان
وسلام ونظرة رضا
صحيت من غفلتى
صحيت على حقيقة مرعبة
لقيت التعالب والديابة
مداريين جوة غيطان الذرة
يخططوا وينفذوا بالشر
ويعملوا خيات معقدة
يقابلوك بالاحضان ويلبسوا
كل الوشوش والاقنعة
يتحالفوا مع الشياطين
وتبدأ ماكينة الهطل والمدهسة
مش مهم أنت مع مين
المهم يكون المعلوم حاجة كويسة
جوة قلوبهم كيد دفين
الكيد اتخلق دايما للنسا
أبو ضحكة صفراء على وشه
ظاهرة في سواد قلبه وغشه
الغريب أنه عارف نفسه
وفاكر الناس كلها مش عارفه
واللى يقولك الإدارة دى
حاجة سهله
شوف الناس عايزة إيه
وأعمل دايما عكسه
ده المفروض بغباءه
يودوه بسرعة للمستشفى
واللى يقولك كلنا في الشغل
أسرة واحدة
وطول عمرنا بينا
عشرة ومودة
أوعى تصدقه
ده ديب جوة حفره
بيعطى الأمان
ويجهز أسنانه للعضة
زمالة العمل دى غريبة
فيهم الطيب والبكاش والنتاش
منهم إللى لسه في الخدمة
ومنهم إللى خرج معاش
ومنهم إللى باع عمره
وكمان باع ضميره ببلاش
الناس دى أية إللى جرالها
وليه بقت مؤذيه
بيحاربوا على دنيا زايلة
وأعمار آخرها منتهيه
الكدب جواهم بقى طبع مطبوع
والولاء لأى حد يدفع
بس يكون دفيع
وقعوا في مستنقع غوويط
وبظلم الناس منقوع
لا عارفين يخرجوا منه
ولا عارفين طريق الرجوع .
2
-2
