وقالوا البحر غدّار

جَدُّه هزار وجنّته نار

طب سألوا البحر عن أعذار

حكموا عليه م الظاهر

والصدق مش دايمًا في المظاهر

وقالوا البحر سلّاب

بيسلب غيره ومالوش عقاب

طب هم سألوه عن الأسباب

قالوا عليه حاجة مش فيه

يبقى مين بقى الكدّاب

وقالوا البحر مش مضمون

العايم فيه مش مأمون

طب مالُه ومال العايم

ما هو كان صاحي نايم

قاعد قايم

يحبّ البحر والعوم

ويا عيني على المهموم

صبح قلبه م الهَوى مكلوم

وقالوا البحر بيغرّق

حبيب وغريب مش بيفرّق

مين اللي قال؟

ده البحر يا ناس شيّال

هموم وغموم تهدّ جبال

طول عُمره يا عيني حَمّال

وقالوا البحر مش طيّب

موجه قلّاب ولظنّ غيره بيخيّب

إزاي وهو للجروح بيداوي ويطيّب؟

طب عرفوا البحر من قُريب

وقالوا البحر مش أمين

رغم إنه حافظ أسرارهم من سنين

طب هم أمنوه على حاجة بعينها

رجعوا لاقوه غيّرها من مكانها

حكموا عليه على أيّ أساس

بالعقل ولا كلام ناس؟!

قالوا مهما قالوا

البحر هو البحر

ولا حاجة تهزّ كيانه.