مالك يا خيلي ما عُدت تتكلم

صمتك أليم في القلب بيعلّم

وجع السكوت ما يهون إلَّا على الفاضي

قلبك عزيز غالي نَصَّبني أنا قاضي

حزنت ومالو ده الحُزن شيء عادي

لكن وجعه مش ممكن يكون عادي

سلّمها للرحمٰن فرسي الحبيب أصلان

أحبّ لك الخير وأكره تكون زعلان

ده أنت يا طيّب بتداوي وتطيّب

مش ممكن أسيبك للهَمّ وأقول: طيّب

غابتْ بسمتك وظهرتْ دمعتك

وما بينهم حسرة بتدبح في نفسيتك

أنا كنت بعيد عنك لأجل الغلا جيت لك

ولا جه في بالي يوم أشوفك كده مهموم

والقلب متكتّف جريح ومأريف

والنفس صعبانة على حالها زعلانة

خيلي الحبيب مالك إيه اللي جرى لك

يحصل ده كُلّه فيك يا خيلي أنا أفديك

باللي يرجعلك قلبك ويسمع لك

بس أنت مش تخجل منّي ولا تبعد عنّي

ما إحنا يا خيلي أصحاب ما بنزعلش م العِتاب

احكي وفضفض لي همسك يا خيلي واحشني

دي همومك اللي شايلها

ربّك بعتني ليك علشان نقسّمها

بدل ما تشيل لوحدك أنا هنا جنبك

أشيل معاك الهَمّ وأشاركك

خيلي الحبيب مالك

متغيّرة أحوالك

طب أنا هنا قرّبت

ليه أنت عنّي بِعدت

طب أنا جيت ومش ماشية

أقولك: اوعى تشيل الهَمّ طول ما أنا عايشة

خيلي الحبيب مالك هو مالي

مش هاسيبك للهَمّ يا حالي ومحتالي

قرّب منّي.. شايف دمعي

ده دمعك اللي مداريه

وفي عيونك مخبّيه

بيجري في قلبي

أوّل ما بحسّ بيه

دوّر كده في عيونك مش هاتلاقيه

علشان أنا صورة ليك

باخد من ضعفك وأقويك

وأديلك قُبلة تفاؤل بين عينيك

خيلي الحبيب مالك كده زعلان

أنت يا أصيل جعلت قلبي يميل

والحين صَبَح حزنان بعد ما كان سعدان

خيلي قوم بينا ننثُر أمانينا

وبنور الأمل نكّحل عينينا

عيني في عينك كده

نفسك تفرح.. مش كده

طب بُصّ في عيوني هاتلاقيك

زي ما بتدور عليك

أمير الخيل طبعه أصيل

لا بيضعف ولا بيميل

بتحزن آه وده طبع الحياة

عيوني لهمومك نجاة

بُصّ كمان شُفتك فرحان

ما أنا قُلت لك: بعيوني هاتكون سعدان

بُصّ يا خيل يا غالي وجميل

شايف اللي أنا شايفاه

رجعت تاني خيلي اللي أنا عارفاه

قُلت لك: ما تشيلش هَمّ

ولا تغتَمّ بكرا هاتتعدل 

والوضع يتبدل

خلليك سعيد معايا

أقولك حاجة حلوة

حدودتة ولا حكاية

قصّة ولا رواية

أقولك يا خيلي

أنت مفيش منك

يا قمر ليلي 

عارف إنَّك

عزيز وحنون

خيلي الحبيب أهلًا

أنا هُنا لأجلكَ فلا تَحمِل هَمًّا.