لما بنشوف حد بيدخن بعض مننا بيوبّخ فيه من غير ما يعرف هو ليه بقى بيدخن؟
طبعًا التدخين سلوك مُضّر جدًا، ولا يجوز شرعًا بل ويُحرّم لأضراره العظيمة، واللي أكدّها الأطباء المُختصين.
مالك مكشّر كده ليه؟
بتقول: إنك بتدخن ومش قادر تبطل.
طب مبدأئيًا كده أنت حلو، وكونك عايز تبطل تدخين دي حاجة حلوة منك لنفسك أولًا وللي بيحبّوك بعد كده، مُجرد إنك فكرت وحاولت ده بيأكد إنك مش هاوي تدخين، حتّى لو مش قدرت تبطل ورجعت تدخن من تاني.
يعني إيه الكلام ده يا مريم؟
يعني أنت مُجبر على التدخين مش بتدخن بمزاجك، واللي يقولك إن اللي بيدخن ده بكِيفه يبقى مش فاهم حاجة، علشان مُعظم المُدخنين زي ما قُلت مجبورين ع التدخين؛ لأسباب كتيييييير جدًا منها على سبيل المثال لا الحصر، أسباب نفسية.
ممكن توضيح يا مريم؟
طبعًا، يعني أنت مثلًا لما بدأت تدخن أكيد كان في سبب ولا أنت كنت هاوي ولا إيه؟
بتقول: فعلًا كان في أسباب مش سبب واحد، وعُمري ما كنت هاوي تدخين ولا حتّى بفكر فيه، بس حصلت لي ظروف مُعيّنة لاقيت نفسي دخلت سكة التدخين.
وده اللي بقولك عليه أسباب نفسية، وطبعًا كل واحد مش هايروح يقول للناس: يا جماعة أنا مُجبر ع التدخين وأسبابي النفسية كيت وكيت.
لأ مش هايحصل كده علشان الأسباب دي سرّ صاحبها، ومش مُهم لأي حد إنه يعرفها؛ لإنَّها مش هاتفيده في حاجة.
كونك عايز تبطل تدخين ده أفضل قرار ممكن تاخده في حياتك، عارف ليه؟
علشان نفسك غالية وعزيزة، وتستاهل تبطل تدخين علشانها.
لو مهما حصل لك ومهما حاولت تبطل تدخين ومش قدرت لأسباب كتيييييير اوعى تيأس، حاول تاني وتالت وعاشر، عافِر مرّة واتنين وألف أنت قدّها وقدود، أخلِص النيّة وقوّي عزيمتك علشانك أنت علشان صّحتك، علشان جسمك، علشان عقلك، علشان نفسك، أنت تستحق كل خير والتدخين ده شرّ ربّنا يتوب عليك منه.
أقولك حاجة حلوة: التدخين عادة وتقدر تبطلها، جرّب تقلل عدد السجاير اللي بتدخنها في اليوم؛ يعني لو بتدخن كتير خلليهم حبة صغيرة أول يوم، تاني يوم حدد عدد مُعيّن للسجاير، تالت يوم كده وهكذا، بعدها شوف السبب اللي خلاك تبقي مُدخِن، أول ما تعرفه حاول تجتنبه بكل الطُرق والوسائل، لو في حد بيعينك ع التدخين ابعد عنه، وطبعًا ابعد عن الضغوطات على قد ما تقدر، كمان لازم من وقت للتاني تغيّر جو غير الجو اللي أنت فيه، تشمّ هوا، تشوف وشوش جديدة، تفرّح عينيك بالخُضرة والمناظر الطبيعية، اعمل حاجة بتحبّها.
لما تلاقي نفسك مش قادر تبطل فكّر في حاجة تعينك على كده، طبعًا أهم حاجة صّحتك، بعد كده فكر وفكر وفكر بجد هاتلاقي أكتر من سبب يعينك.
طبعًا هتدعي ربّنا في صّلاتك إنه يتوب عليك، وربّنا مش هايخذلك.. خلليك واثق إنك حلو وخُسارة في السجاير.
2
-2
