عدّى الزمان بينا
كبرنا خلاص يا نينة
والأمل صبح لينا
والحلم اهو مالينا
عدّى الزمان ولا قال
صبح العيال رجال
والبنت بقت صبيّة
قلبها مليان حنيّة
ويا نينة يا نور عنيا
وحشاني يا غالية عليا
عدّى الزمان بجنون
ميكس الحنين مجنون
قلبك يا نينة حنون
وورثت أنا حنانه
ونبضه وخضارُه
عدّى الزمان يجري
والعُمر بينا بيجري
قطر يا نينة مجري
عدّى الزمان وكان
كان يا ما كاااااااااان
عصفور حلمه يطير
لساه يا نينة صغير
لكنّه واثق إنّه
هاييجي يوم ويكون
زي ما نفسه يكون
يا نينة لساه صغير
مُناه يا نينة يطير
فتح شباك الأمل
شدّ حيله والعمل
بص للسما وقال
منظر عال العال
كُلّ دا براح.. حيّ على الكفاح
ف بحر الأمل أنا السبّاح
عدّى الزمان بينا
كبرت أحلامنا بينا
والسعد يا ربّ لينا
والهنا والخير بإيدينا
بارك يا ربّ لينا
في كُلّ ما لينا
واحفظ بحفظك عبد
طول عُمره يقول يا ربّ
ولا عُمره قال يا حدّ
والثقة باللَّه
بتهزم المُعاناة
وتنوّر قلب ودرب
كُلّ اللي يقول يا ربّ.