مهما الكون مال

اوعاك يا غالي تميل

لو قَلّ معاك المال

شَمِّر وشِدّ الحيل

عيش راجل مش ذليل 

 واوعاك تعيش عويل

مهما الدُّنيا اسودت

والحيطان اتهدّت

والأبواب قفلت

والأحلام بِعدت

اوعاك تَهتمّ

إيَّاك تشيل الهَمّ

دا ربّك الرحمٰن

الرازق المنّان

الكريم الحنّان

الرحيم الستار

الغفور الغفّار

الواحد القهّار

لساك برضو زعلان

ليه وعلى إيه

طب ما لو كان خير

كُنت حطّيت اِيدك عليه

فبلاش زعل وتكدير

ربّك على كُلّ شيءٍ قدير

والصالح المقدّر لك

بحكمته يدّبر أمرك

ويشرح يا غالي صدرك

ويصّبر قلبك ويوسّع رزقك

دا مٰفيش حاجة مُستحيلة

عيش راجل بصحيح

مش كيف النّاس العويلة

راجل تهابه الريح

شايل حمول تقيلة

ثقته بربه كفيلة

تهوّن عليه الشيلة

لو في يوم الحُزن عَمّ

والدُّنيا هَمّ وغَمّ

جهّز ورقك والألوان

ارسم نور يملا المكان

ارسم سما زرقة وطيور

ارسم غيوم وبحور

ارسم شجر ونخيل

ارسم قمر وليل

ارسم حلم جميل

ارسم هدف نبيل

ارسم وارسم وارسم

وبلاش تكسّل

خليك نبهان

واوعاك تحزن 

فيفرح الشَّيطان.