أنت الحلّ

كان يا ما كان

 كان في زمان

إنسان جميل وقلبه حزنان

كان كل شوية مضايق

من كتر همومه مش فايق

طب يعمل إيه؟ 

والحلّ في إيه؟

سأل نفسه كتيييييير

هل هي بالتدبير؟

ولا بالتفكير؟

قعد يفكر ويفكر ويفكر

لحد ما مزاجه اتعكر

فقام ومشي من مكانه

جري.. وما حدش يعرف مكانه

مرّ يوم والتاني

طول عمره حنين ولا عمره كان أناني

أهل البلد كانوا بيدوروا عليه

وهو محبوس في حُفرة ندهت عليه

فضلت تنادي وتنادي علشان تغويه

قرب منها ودخلها برجليه

وكل شوية الحفرة تكبر وتكبر وتكبر

وهو مذهول مش قادر يفكر

سألها أنتِ يا حفرة تطلعي مين

ضحكت وقالت أنا حُزن سنين

كل ما تحزن أنا بكبر

ولو نسيت أنا بخلليك تفكر

قال لها بس أنا مظلوم

ردّت بحزم: وعقلك مغيوم

قال لها مش فاهم

قالت له مش كنت هاكبر لو أنت فاهم.. بُص يا ولدي للنجوم

بَص لاقاهم موجودين

بس فيهم نجم حزين

سألها وده يطلع مين

جاوبت بحزن ده حُزن دفين

كل ما بتحزن وبتحزن وبتحزن

أنا بكبر وهو بيحزن

قال لها مش بايدي أنا مقهور

قالت له أنت جميل، ليّن، ومحبور

سألها الحلّ

جاوبته أنت الحلّ

قال لها إزاي وأنا محبوس

قالت له حُزنك عدو مدسوس

قال بس أنا......

وقبل ما يكمل رجعته لورا سنة

شاف نفسه جميل وباهي

وحلمه بيلمع وزاهي

وقلبه مطمن

وعقله متأمن

وبسمته واضحة

وعيونه صابحة

فرح وقال أنا اهو جيت من تاني

رجعت بيه لزمنه تاني

قال لها ليه ما سبتنيش هناك

قالت له علشان أنت زي ما أنت من غير اللي جواك

لازم تحارب وتكون شُجاع

خلليك للأمل بيّاع

حارب بسلاح اليقين

يكفيك ربّ العالمين

ولما تنتصر النجم هليمع تاني

وترجع لك نفسك تاني

وبعدها بدأت تضيق عليه

وهو بيفكر هايعمل إيه

بص للنجوم وناجي الحيّ القيّوم

وسلّمها للرحمٰن

وغسل قلبه من الأحزان

فجأة النجم لمع وبقى زاهي

والحفرة اختفت والأرض رجعت زي ما هي

وهو رجع فرحان

وقال أنا سعيد مش حزنان

وطالما الأمر للرحمٰن فاطمن ونام قرير العين

ونفض عن روحه حزن السنين

وفوّض أمره لربّ العالمين

فصبح على جبر عظيم

نسّاه كلّ أليم

وتوتة توتة خلصت الحدوتة

حلوة وجميلة ولا معقودة.