احباط احباط يعني

بسم الله

ولدنا ي هذا البلد ..الجميل..ام الدنيا...و سمعنا اغاني لشيرين ..ما شربتش من نيلها ..و جربت تغنيلها ...و شمسها في سماري "مع اني موش سمرا "ما علينا...و شكلها في ملامحي ...و ترااتراااترااابلا بلا بلا ...جميل؟

تربينا علي هذه الشعارات المجلجلة...حتي كبرنا ..و تخرجنا من الجامعة ..وانتظرنا الدور بفارغ الصبر و كلنا طاقة ايجابية لرد هذا الجميل "الغير جميل" لهذا البلد الذي يستحق منا بذل كل ما هو غالي و نفيس و "تخين"....و لسان حالك يقول "انا جاهزللموت من اجل هذه البلد"...

نزلت سوق العمل..و محط تنفيذ ما درسناه..و تحويل الهمم الي انتاج...فازدهار..فدخل..فرخاء..فالباسبور الاخضر يبقي له قيمة ...و هيا الي العمل..و نصرة و فرحة و الف سلامة.........

و ياليتنا لم ننزل..حتي كنا احتفظنا برونق الشعارات ..و فضلنا نغني الاغاني "اللي احنا شاطرين" فيها بحب و بمصداقية ..الا ان الواقع و الزمن اراد ان يقول لنا"فوقوا يا مساكين...دول مصريين ...انتوا لسا نايمين؟!!!"

تفاجا حينما تعمل بجد ..و تنفذ ما درسته بقواعد السلامة و الصحة و المهنية ...نفر ليس بقليل من البشر تقول لك "ايه الفزلكة دي !..ده كلام كتب!..ما تخليك في حالك!..انا وجدنا اباءنا علي امة و انا علي اثارهم مقتدون يا قليل الخبرة!!...

تثور ..و تعترض ..و تطلع للمدير ..تلاقي " رب البيت بالدف ضارب "!

لحظتها يا فدائي امامك حل من اتنين ...يا تزعق و تحمر و يرتفع ضغطك و يجيلك جلطة و انت واقف مكانك "حل غير دبلوماسي"
يا تسير ورا القطيع ..و تبدا "تعك"في الشغل و تنفذ اللي كله ماشي علية ..و تنسي تماما اي معلومة قريتها او خبرة نظرية حصلت عليها "حل رائع و "يأكل عيش"!
و تشتغل و انت ضميرك تاعبك ..و مش راضي عن نفسك..و تنتظر اي فرصة عشان تهج

و من سياتي بعدك..سيسير علي دربك...
و هكذا دواليك!!

و نسال نفسنا "هي ليه البلد ما بتتقدمش "...طب ازاي!

ملحوظة:هناك احصائية تقول ان معدل صافي ساعات العمل يوميا للعامل المصري :.......
.
.
.
.
.
.
.
نص ساعة
:)