يا غزة صوت الشهيد 

ب يلالى ف العالى 

لبى الندا لبى 

و خدينى طوالى

قلبى إللى رفرف أوى 

خلى الكيان زلزال

عمال على بطال 

نفسه ينولهالى

ياغزه جرحك كوانى 

والصبر زاد الكى

النور ف ليلك جفانى 

والضلمه مالها زى

مماتش ابنك حاشاه

 ابنك شهيدك حى

مهما تزيد عتمتك !!!

والله فجرك جى 

.

يا غزه صوت الصبايا

 بكى القانون والناى

أطفالك المعجزات 

متحملين ازاى

بيجدفوا وحدهم . 

عاتى ياموج عداى 

مهما يثور جرحهم !!!

طاويين جراحهم طى .

يا غزه صوت الولد 

إللى صرخ أمى

ماتت عشان البلد 

وانا مين يشيل همى

مين اللى يسقينى

الشهد و يسمّى

مين اللى م الأطلال

يبنى بيوت الحى

يا غزه بتهزنى 

الدمعه من عينك

والله لو ع الفدا 

لجرى ف شرايينك

و اروى بدمى الثرى

تطرح رياحينك 

والقمح جنب الذره

تعمر طواحينك

كل اللى هاجرينك 

راجعين ف أول ضى