صباح الخير 

خلاص قررت تبقى بخير ؟

وتبعد فوق ما يعلىَ الطير 

كتير مسافات هتبعدها 

عشان ف نهاية الرحله 

تعيش احساس يكون أحلى 

يامحلا اللى يبات مغلوب 

ومش ظالم .

 زمان كنا بنتقاسم

 فتات الأرض 

نطوف فيها بطول و بعرض

وقبل النوم سوا بردوا نصلى الفرض 

 ايه يمنع ؟

جديد ايه اللى خلانا بنكره بعض؟ 

و نتمنى نعيش غربه 

ومين ف الفُرقه شاف السعد ؟

صباح الورد ....لو فاكر شذاه ف الفجر

 كأن الليل ده كله قدر 

بنوصل أوله لآخره ونستنى يغيب البدر

بلاش الهجر 

انا عمرى ما بتخيل 

أشوف من قلبك انت الغدر .

وقصتنا اللى مش ثابته 

مابين المد كام مره 

وألفين جزر

 لكن بردوا ف نهاية الشد

 تلاقنا بنتمسك بجد ببعض 

ف أعتبر الكلام ده النقض

 على حكم البعاد اليوم 

شفاعة عِشره عِشناها 

وكام سِكّه مشيناها 

خطاوى كتير طويناها

سلاسل ذكريات واشواق ..

بلاها فراق

وعارف ان انا المحقوق 

وحقك أيوه محقوق لك

ماتحسبليش ولا احسبلك

بصك الدم بكتب لك و ب دموعى 

ف لو تتمنى تفراقنى مبتمناش

ح تلقى غيرى يشتاقلك أنا ما القاش

ح تفضل حتى ف غيابك دوا للروح 

انا المحقوق و انا الجارح وانا المجروح

رجوعك مش دوا وخلاص 

رجوعك ليا رد الروح