مرايا الكل شايفينك

مرايا الكل شايفينك
وانا وحدى إللى بيكى بحس
شمالى شايفوا بيمينك
كأنى حته منك بس
انا المذبوح ف أرضك ذبح
كيف الكبش
خلصتينى نهب وهبش
وكأنى لانا منك ولا فيكى شبه منى
ولما قولت أدمنتك
وخليت عهد الهوا أمانتك
وأمنتك
ف عز الخوف
وكنت ستارك الغالى
وسور عالى
بيحميكى
وحواليكى
ف عز العتمه كنت بطوف
بقيت دلوقتى تشوفينى كأنى غريب ؟
عجيبه انتى وبهتانه
يا لوحه ملونه خيانه
بقيتى مرايا تعكس وجه كل الناس
تجمملهم ماتنساهم وتنسانه
ولا بتلمح ملامح وجه
كان بيدوب فى تفاصيلك
كأنه حته من طينك
وكان مدبوح ف أرضك ذبح
كيف الكبش
يتألم و ينزف دم لا يشكى
ولا بيبوح
وأصلا بوحُه مش مسموح
أنا المجروح
وجرح الجسم شيئ عادى
وجرح القلب بيعدى
لكن الموت ف جرح الروح
مرايا فجرها شروقى
بتجرى ف دمى وعروقى
دا كان ف زمان
لكنى الآن
بعيش من غيرك الويله
وقضبان القسى طويله
محطه بعدها محطه
وميت دوران وتحويله
وامتى الزيت يقول شطبت
ويتوقف قطار عمرى لأنى تعبت
ومن بعدك خِلِص فرحى إللى كان ممنوح
وجف الدمع من عينى
وانا باستنجدك عينى
لكن صراخى مش مسموع