فى المعركه الكل فيها بيبقى خسران أو مصاب
اوعاك تقول انك بطل حامى الحما وقت الصعاب
.............
فى المعركه شفت الجنود واقفين طابور
مستنيين بس الإشاره من قائدهم للعبور
بنيان حديد كانوا الجنود لكن بإحساس وبشعور
............
عدت هناك الطيارات فوقهم بترمى ف القذايف
غاره تلتها كتير غارات الكل مات ولا حد خايف
جثث كتير متجمعه دي ادين حسن ودا وش عاطف
طب ده عَلِىِ و جرجس هناك ودا عم صابر
واقفه الدموع متكتفه رغم الألم مهما أعافر
لكنى فاكر
.....
فاكر ساعتها الدمعه سالت وبغزاره عند مين
دورت انا ف كل الجثث ع الذكريات وع السنين
احمد يارمزى انته فين؟
...........
احمد هناك جريت عليه من لهفة القلب الحزين
هو الوحيد اللى ما صابهوش الرصاص ولا الشظايا
شفته كان حاضن معاه كل الأحبه القصص كل الحَكايا
مات الولد لما اتجلد قلبه و ماتحملش يقرأ للنهايه
..........
وف ايديه شفت الجواب اسم لينا كان عليه
مضمونه ضرب رصاص و دانة آر بى جيه
فاتت ف قلب القلب ماسابتش نبضه فيه
مات الجدع م الوجع والدمع مات ف عنيه