بفتح عينى بالعافيه
واشوف الدنيا مش صافيه
وسامع صوت بعيد دافي
و أصوات تانيه مش دافيه .
فى ريحة بينج ماليانى وشايف
سقف كان بيطير
غرف وابواب يمين وشمال وصوت
وصوت بيقول فين التخدير
لقيتنى فجأة تحت الضوء
وفى واحد بيسألنى
يقول لى حافظ الفاتحه؟
فقلت ودا سؤال يعنى
أكيد انا حافظ الفاتحه
فقال إقرا
بدأت بحمد رب الكون
كما عيل بيختبروه
لكنى لقيتنى فجأه بتوه
وفيه تشويش انا عارفُه
فقال لى هاااا ؟ فين الفاتحه
نسيت الشكل والمنظر
لكنى فاكر المضمون
رجعت حمدت رب الكون
وتهت ف ملك رب الناس.
ماتسمعليش غير الأنفاس
.........................
وافتح عينى بالعافيه
وبردو الدنيا مش صافيه
وصوت تانى قريب دافي
يقول لى كمل الفاتحه
وصوت ضحكُو نغم وشجون
بدأت افوق
وزاغت عينى تحت و فوق
كأن المشهد اتكرر
لكن فوقى .... ماشفتش ضوء
وبدأت قصتى نحوى
وزى ما بكتب العامٍِي
هكمل ... بس بالنحوى
عن الألم الذى أشكو بلا شكوى
هنا جرح وذا ألم وتلك الطامة الكبرى
انا لا أذكر الأشياء والأسماء والذكرى
انا لا أذكر التاريخ
والأحلام
بل لا أذكر الايام
والأوهام
انا حتى بلا ذِكرٍ ولا ذِكرَى
لا أعرف من أكون أنا
وكيف أتيت إلى هنا
وتلك مصيبتى الكبرى ....
شعور غريب انك وحيد
كل إللى حواليك لو حسوا بيك
قريبين منك
لكنك
انت إللى من جواك بعيد
كمل وعافر
واعصر الدم ف عروقك
بس بردوا مفيش جديد ؟
خليك عنيد
خليك قوى
وخليك شديد
اتولدلك عمر تانى
فكون أنانى
ابتدى وفكر وحاسب م إللى جي
اثبت وجودك للى حواليك قول لهم ان انته حى
لو لسه حى ؟
دور عليك
جواك ملامح حد كان عايش وعارف هوا مين
أسأل عنيك
قبل اما يحصلك ده كله شوفت مين من يومين
دا يادوب يومين
قالولي حاول تفتكر
طب تفتكر لما هحاول هفتكر
وانا ناسى إسمى و حتى ناسى نسيونى
بعصر دماغى كأنى مش عايش ف كونى
نفسى اعرف اسمى ايه
2
-2
