مساء الخير.. انا اتنصب عليا وبكتب البوست ده عشان احذر الناس كلها من اللي حصل معايا.. 

واحد اتصل بيا من الرقم ده 01013846626... وقالي مساء الخير حضرتك ليكي منحة من جمعية مش عارف ايه.. رغم ان اسم الجمعية غريب عني وسألت نفسي منحة ايه دي وهيدوهالي ليه.. بس قالي ان رقمك اترشح للمنحة واحنا اخترناه وقيمتها ٥٠٠٠ جنيه.. انا قولت همشي معاه للآخر وطبعا مش هديله مليم ولا اي تفاصيل.. 

وفعلا قالي رقمك عليه محفظة فودافون كاش قولتله ايوا.. قالي هنحول الفلوس عليه دلوقتي حالا.. اتصلي ب الكود الفلاني عملت كده.. قالي مليني الكود اللي ظهرلك.. كود غريب مليتهوله.. قالي اعملي استعلام عملت.. قالي طبعا الفلوس اتحولتلك.. قولتله لا مفيش حاجة وصلت.. قالي ازاي واتنرفز وزعل جدا.. طب رصيدك كام دلوقتي قولتله ٣٢٥ جنيه.. قالي طب مفيش معاكي اي محافظ تاني اصل التحويل مش هقابل عليه "غالبا لقي المبلغ عبيط ومش مستاهل تعبه😂😂😂" .. قولتله لا مش معايا محافظ تاني.. انا ماشبة وراه مش متخيلة انه هينصب فعلا ويسخب الفلوس دي.. عايزة اشوفه هيعمل ايه.. المهم قالي طيب اعملي استعلام تاني لقيت المبلغ خمسة جنيه.. قولتله ياسلام ده انت نصاب بقى.. قالي اه طبعا عشان متكلميش حد تاني في التليفون.. كده بالحرف وبكل بجاحة وفي نهار رمضان.. 

زمان الحرامي كان يسرق شنطة ويطلع يجري.. وممكن يتمسك ياكل علقة موت ولو جري بيها مش هيلاقي حاجة في الغالب.. ومكانش بيعرف يواجه طبعا كان بيتكسف من عملته.. دلوقتي الحكاية بقيت مرعبة اوي.. 

انا متضايقة مش ع الفلوس بس ع البجاحة اللي كلمني بيها.. ولا كأنه سارقني.. 

خلوا بالكم وربنا ينجينا جميعا ..