النهاردة الغدا كان ملوخية ورز وكوكو.. 

طبعا مش هقولكم الملوخية بتاعتي عظمة قد ايه وقد ايه انا اصلا بحب الأكلة دي لأنها أكتر أكلة يتفكرني بعماتي وبابا وريحة بيوتهم كلهم.. كنت تخبط الباب وتدخل في أي وقت ان شاالله ولو روحت في نص الليل هتاكل ملوخية صعيدي ورز ولحمة محمرة في الطاجن وتنسى همومك لو عليك جبل هموم.. ربنا يرحمهم ويسكنهم فسيح جناته ويرحم أمواتنا جميعاً.. بس مش هو ده الموضوع.. 

الموضوع هو أنه وانا بفصص التوم استعدادا لعمل الطشة اللي بتخرب الدنيا بالريحة كنت سرحانة وبفكر كعادتي في أفعال بعض الناس وقلوبهم القاسية وتعمدهم جرح الناس وإيذاءها النفسي.. لقيت تومه جواها قلب جميل اوي وصغنن.. فرحت بيه جدا وحسيت أنه يشبه قلبي أبيض وطيب وبرئ.. يشبه قلوب بدعي إني اقابلها في الحياة طول رحلتي.. ربنا يهون الرحلة ويجعلها لطيفة وسهلة وخفيفة.. نخرج منها طايرين لا لينا تار ولا علينا تار.. طاب مساؤكم ويارب أيامكم كلها لطيفة وخفيفة وسهلة.. تقابلوا ناس رحيمة تقدر وتعذر وتحن وبس..