ربك هو العالم

ربك هو العالم.. ربك رب قلوب 

مين عارف يا حبيبي.. ايه لينا مكتوب

واحنا قلوب مشتاقة.. والدنيا سراقة

دنيا فيها الغالب.. تاني يوم مغلوب

في أغاني بتعدي علينا مجرد صورة حلوة تاخدك وتسرح بيك.. بتنبسط بسماعها لما توصل لعمقها.. بس بتفوق وتكمل حياتك عادي.. وفي أغاني بتبقى علامات.. بتمشي معاك طريقك وتونسك بكلماتها.. بتديك دروس.. وتحسسك أنك مش لوحدك.. في غيرك حصل معاه نفس الموقف.. بس الفرق بينكم أن هو عرف يعبر عن ده ووصله للدنيا كلها.. 

الشاعر عبد الرحيم منصور عمل كده في ربك هو العالم ربك رب قلوب.. مكانش عايز يكتب أغنية وخلاص.. كان عايز يعمل ونس لكل جيل.. أنواع الناس مبتتغيرش.. وربك برضو هيفضل رب قلوب.. وهيفضل هو المتطلع والكاشف والعالم ما في الصدور.. وما تكن الأنفس..

نرجع للأغنية.. عم أحمد منيب الموسيقار الكبير والصادق جداً والمخلص جداً جداً لأصله ووطنه.. كان عنده ألحان نوبية على كلام نوبي.. عبد الرحيم منصور كان مشدود جداً ناحية الجزء الجنوبي النوبي اللي في عم منيب.. وقرر أنه يكتب كلام مصري على الألحان النوبية وعملوا تجارب كتير قوي ناجحة جدا وعايشة معانا لحد النهاردة.. ومنهم قول للغريب..وربك هو العالم.. وغيرها كتير قوي.. 

عبد الرحيم أخد اللحن وحفظه وعاش جواه وفي روحه وكتب ملحمة بتجسد البشر بكل أصنافهم.. مش بس البشر.. وكمان الدنيا كلها.. تحس أنها مش مجرد أغنية.. لا.. دي ماهية الكون.. اتكلم عن الطماع اللي عايز يكوش.. واتكلم عن اللي واخدها طول وعرض وماشي في الدنيا ولا هامه.. والقلب البراني والحليب.. والكداب اللي من كتر كدبه بقى عايش غريب مش عارف حتى يصدق نفسه ولا يحسها ولا عارف هو مين فيهم.. واتكلم عن اللي بوشين.. اللي بيضحكلك ومن ضهرك بيغشك.. وفي الآخر خالص بيقولك أن ربنا وحده هو العالم بما في الصدور.. بس سمى ابو قلب حليب ونية صافية "الغانم والسالم".. وأبو قلب مغشوش ونية مش سليمة "البراني".. 

بحب اسمعها قوي بصوت صادق قلليني اللي كان في بينا معاد بس للأسف القدر سبق المعاد ومعرفتش أقابله.. ولحن الموسيقار أحمد منيب وتوزيع الدكتور فتحي سلامة..