لما حد بيقابلني ونكون بقالنا سنين متقابلناش.. في جملة لازم يقولهالي "متغيرتيش خالص".. كنت بزعل قوي من الجملة دي لأن كنت بعتبر ان المفروض التجارب تغيرني وكمان كان في فترة كده الناس بتشوفني طفلة جدا مش بسني بس ببراءتي وسذاجتي في الحياة ف انا كان نفسي اعدي المرحلة دي.. المهم انه لحد النهاردة الناس تقابلني ويقولولي متغيرتيش وكنت بزعل .. لحد م شوفت وحدة وهي بتتغير بسبب علاقتها بأحد الأشخاص اللي مش شبهها خالص .. كل حاجة فيها اتغيرت.. حتى صوتها بقى خايف قوي ومرعوش.. ملامحها بقيت مش بتاعتها.. لا حلوة ولا وحشة.. مش هي وخلاص.. حاجة مقرفة جدا بالنسبالي.. 

ف حمدت ربنا على عدم التغيير.. 

واكتشفت انه لو الناس مش بتشوف ان السنين غيرت فيك طيبتك وبراءتك وجمال روحك.. يبقى انت في نعمة عظيمة احمد عليها ربنا وافرح لما الناس تقولك متغيرتش.. 

الخلاصة اعرفوا ناس تشبهلكم.. بلاش تبقوا مسخ منكم.. بعد شويه الناس دي هتسيبكم وانتو هتسيبوهم لانهم ببساطة مش شبهكم.. مش هتعرفوا تكملوا.. بس بعد م تبقو اتشوهتوا.. لا هتعرفوا ترجعوا ولا هتعرفوا تكملوا.. هتقفوا في النص..