صباح الخير.. 

من امبارح عندي كام حاجة عايزة اقولهم وانا شايفة اصدقائي وزمايلي وكل الناس اللي اعرفهم عاملين هجوم شديد على أغنية لطيفة في مهرجان تحدي القراءة..

أولا ده حدث ضخم وشرف لأي عربي المشاركة فيه "وعربي دي يعني مصري والعكس صحيح لأننا تقريباً كده نسينا وبقينا نتكلم عن اننا اتنين مش واحد"

ثانياً هويتنا المصرية مش بأغنية غنتها لطيفة في فيلم ليوسف شاهين مع أن الأصل هيبقى برضو هو مراحش حتة.. الشاعر الكبير جمال بخيت طُلب منه بعد تفاصيل كتير يحط كلمات على لحن الموسيقار الكبير عُمر خيرت لظروف صحية بيمر بيها الأخير ف مش هيقدر يعمل لحن جديد لكلمات جديدة.. فين المشكلة؟!.. هويتنا المصرية خلاص اتبعترت ومش هنعرف نلمها تاني😱.. مفهوم الهوية أكبر من كده بكتير جداً.. 

ثالثاً احنا بقينا عاملين وأنا آسفة اوي في اللي هقوله بس حقيقي عاملين زي اللي مقدرش يتشطر على اللي بيهدم تراثنا المعماري وبيغير شكل حياتنا وشوارعنا وبيدمر تراثنا الانساني ويدوس عليه ف بنتشطر على أغنية كده كده موجودة والله العظيم ومراحتش حتة.. 

بلاش نبقى على راسنا بطحة وواقفين على تكة.. لطيفة مطربة عربية وابتدت من مصر وبتعشق ترابها.. عُمر خيرت وجمال بخيت " مع حفظ الألقاب" مينفعش أصلاً نشكك ولا نتناقش في مصريتهم... انما احنا مش عارفين نفتح بقنا في الدمار اللي بيحصل ف طلعنا قهرنا في لطيفة..

أنا شايفة أن لطيفة ست لطيفة وغنت أغنية لطيفة كلمات شاعر كبير مينفعش نقوله ليه غيرت في كلمات أغنية وبدل المصري حطيت العربي حاجات صغيرة قوي وضيقة وهو أكبر من كده بكتير اوي.. بالإضافة ان ده محصلش لان الكلمات كلها اتغيرت يعني بقيت اغنية جديدة اصلا مقصدش يشيل المصري ويبدله بالعربي عشان يقول ان المصري مبقاش له وجود ولا اي حد يقدر يقول كده..

اسمعهو أغنية متغربيناش لعلي الحجار.. اللي مبقدرش اسمعها وانا سايقة لاني لازم هعيط لحد م اخيش من كتر دموعي وقد ايه بتتكلم عن المصري الأصيل اللي بيحس بالغربة لو خرج خطوة بره بيته ووطنه الحبيب مصر.. 

طبعا مش محتاجة اقولكم انها كلمات الشاعر المصري الكبير الأصيل جمال بخيت..

شكراً يا أستاذ جمال Gamal Bekheet أن حضرتك موجود معانا بفنك وانسانيتك وأصلك ومصريتك.. 

شكرا للموسيقار الكبير عمر خيرت وبنتمناله الشفاء العاجل.. 

وأخيراً شكراً للمصرية بالدم والروح اللطيفة جداً لطيفة..