أم كلثوم ليها غنوة عظيمة جدا.. يمكن من أعظم أغانيها وهي "هسيبك للزمن".. كلمات الشاعر الكبير عبد الوهاب محمد ولحن رياض السنباطي.. الكلمات بتقول هسيبك للزمن لا عتاب ولا شجن تقاسي م الندم وتعرف الالم.. 

لما حد يقهرك ويظلمك احسن عقاب له هو ان انت فعلا تسيبه للزمن.. صدقوني وعن تجربة بالنسبالي.. أولا هيشرب من نفس الكاس ويجيلك وهو في أسوأ حالاته.. عشان يطلب منك بس تسامحه.. طبعا ساعتها انت حر لأن الغفران والتسامح مش بالغصب أبداً.. 

الزمن أكبر معالج لكل حاجة بينسي ويصبر وبياخدلك حقك تالت ومتلت وانت قاعد وحاتط رجل على رجل.. انا دايما لما بتظلم بقول مش مهم ربنا هيجبلي حقي وانا حاتطه رجل على رجل.. 

وبيحصل..

عيش حياتك وانسى اللي ظلمك.. مش هتنسى ظلمه ليك طبعا بس هتنساه هو.. والنسيان على قد م هو نعمة من عند ربنا بس احياناً بيكون نوع من الانتقام.. انا في ناس كتير قوي ظلموني فاكرة هما عملوا ايه فيا كويس قوي.. بس والله ولا فاكرة اساميهم ولا ملامحهم.. ومهما حاولت افتكر مش بقدر.. بس متأكدة انهم فاكريني قوي قوي ومبروحش من بالهم ابداً.. 

محدش بيهرب من اللي عمله.. كل واحد فينا بيقابل أفعاله في الطريق.. بالظبط زي ما عمل بيتعمل فيه.. 

هيدوق من نفس الكاس يعني.. وعلى رأي وحدة كانت دايماً تقول " كاس وداير" مع أنها معملتش بالجملة.. لأن الكاس اللي شرّبت منه غيرها هيدور ويرجعلها وهتشرب منه.. 

الخلاصة متندمش على طيبتك ولا إخلاصك في العلاقات ولا عطاءك وتنازلك وتسامحك معاهم بالعكس اديهم قوي عشان لما تقفل متفتحش تاني.. 

وعلى رأي الست لما قالت الزمن هيدوقك في البعد ناري.. الزمن هو اللي هيخلصلي تاري.. 

هيجولك ييكوا ويشكوا وساعتها بصلهم وقولهم ياللي مرحمتوش عينيا لما كان قلبي في ايديكم.. 

دارت الأيام عليكم…