حمدي منصور.. 

الشاعر الكبير العظيم اللي علمني اتكلم بعيني وافهم عيون الناس.. 

اللي وصى عليا جنون الشعر وحلفهم ميسوبنيش...

اللي اداني من روحه.. روح ❤️ ..

حمدي البكري .. واول شخص حسسني اني ام.. مكنتش محتاجة العب بعرايس وانا طفلة عشان اشبع احساس الامومة الفطري جوايا عشان كان عندي حمدي ❤️ .. مستغربس الاحساس مع ابني ولا حسيت انه احساس جديد عليا.. لاني عشته مع حمدي ❤️❤️❤️..

حمدي منصور مكانش ابويا.. ده أول طفل كبير اتسند عليا ..واتعكزت عليه.. وعمري ما خذلته.. وعمره ما حسسني اني قليلة.. واني مش هقدر اعمل.. مكنتش بحتاج اتكلم وهو جنبي.. كنت بروحله وانا كلي هموم اقعد جنبه بس.. بقوم حامده ربنا على نعمة وجوده في حياتي.. 

حمدي لما كان يتكلم عني كشاعرة كنت بحس أنه بيتكلم على حد عظيم مش انا خالص.. حمدي ابني اللي عدى م السنين سبعين ومكبرشي.. ولا هيكبر وهيفضل عايش جوايا لحد اخر نغس فيا..

علمني ازاي اختار كلامي وازاي مجرحش اللي قدامي.. 

ربنا ميحرمنيش من سيرتك الطيبة وتفضل ابني البكري..وحب عمري.. وأيامي الحلوة.. والشخص الوحيد اللي عمره ما كسر خاطري..

كل لحظة وانت الحب يا حمدي.. انا موجوعة قوي.. ومافيش حاجة بتداويني ولا بتصبرني.. جوايا نار.. وحاجات مش عارفة اكتب ولا اتكلم عنها بس بدور عليك طول الوقت.. ليل نهار بدور على صوتك وحضنك وحشتني قوي.. كل تفاصيلك وحشتني.. اسمي وانت بتناديه.. دلعك عليا.. ومحايلتي ليك عشان تاكل وتشرب.. من ساعة م سافرت مشربتش شاي زي اللي كنا بنشربه سوا.. ولا اكلت زي ما باكل معاك.. حتى النوم مبقتش بعرف انام.. ولو عيني غفلت عشر دقايق بحلم اني بدور عليك في كل حته.. واصحى ادور برضو.. جوايا وجع بس.. ومش قادرة اعبر عنه..