السر في الصحبة

زمان بس مش زمان اوي يعني كان عندي صديقة كانت كل م تلاقي نفسها متضايقة او مخنوقة تقولي تعالي ننزل نتمشى.. 

كنا ننزل اي وقت ونروح نفس الشوارع.. هما شارعين او تلاتة بالكتير.. نفضل رايحين جايين فيهم طول الليل.. وغالباً كنا بنحكي نفس الحكاوي.. كنت استغرب اوي.. 

ازاي بنبسط بالشكل ده وارجع كأني سافرت بلاد بره مثلا غيرت جو فعلا ونفسية واتخلصت من كل الطاقات السلبية وهي كمان نفس الحكاية.. كنا بنرجع مبسوطين وكمان طايرين م الفرحة.. 

اكتشفت ان السر مش في الأماكن ولا في المواضيع.. السر في الصحبة.. الونس.. شخص تبقى متأكد أنه سامعك عشان عايز يسمعك.. ولما بيسمعك احساسك بيوصله كأنه طالع من قلبه هو مش من قلبك انت..

المهم هي ليه بقى لما كانت تبقى متضايقة كانت تقولي ننزل؟!.. لأنها كانت بتضحك على كلامي 😂😂😂.. اه والله.. كنت طول م احنا ماشيين اقعد اقولها تخيلي كده اننا روحنا المكان الفلاني.. تخيلي اننا قابلنا الشخص الفلاني.. تخيلي اني جبتلك كذا.. تخيلي ان فلان كلمنا.. وطبعا لأن كلها بالنسبالها كانت تخيلات ومستحيلات.. فكانت تقعد تضحك بجد.. بس اللي متعرفهوش أنها التخيلات دي كانت حياتي.. كانت أهداف بالنسبالي.. سعادتها وراحتها كانت هدف بالنسبالي.. 

لفت الأيام ودارت وحققتلها كل حاجة خليتها تتخيلها.. لدرجة انها بقيت واحنا بنتمشى تقولي مي م تعمليلنا كذا.. او تجيبيلنا كذا.. او م تيجي نروح المكان الفلاني.. لانها بقيت بتتعامل معايا زي العصاية السحرية كده... ماعدا حاجة وحدة قولتلها تخيليها هي مرضيتش تخليني اعملها وسابتني قبل م اعملهالها...

قولتلها تخيلي نكبر ونعجز ونتعكز على بعض😞😞😞..

بس هي مقبلتش.. حبت تعيش حياتها بعيد عني.. قالت اني بقيت مصدر مرض وقلق وازعاج ليها.. مع اني لحد النهاردة بتمشى معاها في نفس الشوارع وبقولها تخيلي بس بقولها تخيلي لو كنا مع بعض... أكيد الحياة كانت هتبقى اجمل وارحم والطف... 

وعمرها ما كانت مصدر مرض ولا قلق ولا ازعاج بالنسبالي.. 

بس في حاجات لما بتتشرخ الزمن مبيعرفش يداويها.. وفي احزان مبتصغرش مع الوقت.. خيانة الود صعبة.. متعتادةش قرب الناس الحنينة وتبتدوا تقسوهم.. الحنين لو قسي مبيرجعش..