السياحة الدينية التى يجب أن نحييها 

❤️خليليات❤️

✍️ان الدول الغربية كالمانيا وفرنسا والدول الشرقية كالصين 

إذا سافرت اليها دارساً او زائراً ينظمون لك رحلات إلى عظمائهم مرة إلى هتلر ومرة إلى نابليون وأخرى إلى بوذا انهم يريدون منك تعظيم هؤلاء ولو كانوا حتى فجرة وقتلة ولكنهم يعظمون عظمائهم حتى ولو كانوا فى القبور …..

فتعالى معى إلى رحلة قصيرة فى منطقة المقطم فى قاهرة المعز 

تعالى لنركب من رمسيس إلى المقطم، يمكنك ركوب أحد الأتوبيسات التالية: 415 أو 755، أو ميني باص رقم 202. يمكنك النزول في محطة القطامية

🌹انزل معى إلى القرافة واطلع معى على الأباجية أو القرافة الصغرى 

✍️هتلاقي معى مسجد اسمه "مسجد الليث بن سعد"فقيه مصر وعالمها وكم اخذ وتعلم منه مالك امام دار الهجرة 

هناخد مع بعض جهة اليمين ربنا يجعلنا من أهل اليمين …

✍️هاتدخل و تفضل ماشي إلى جهة اليمن هتلاقي ضريح ذو النون المصري أبو الفيض» ولقبه «ذو النون»، أحد علماء المسلمين في القرن الثالث الهجري ومن المحدثين الفقهاء. ولد في أخميم في مصر سنة 179 هـ وكتابه «حل الرموز وبرء الأسقام في كشف أصول اللغات والأقلام»لهو خير شاهد على عظمته 

✍️وهتفضل ماشى معاى على اليمين و تفضل ماشي هتلاقي نفسك بين ضريحين

واحد مكتوب عليه رابعة العدوية ( أيوه رابعة العدوية مستغرب ليه سيدة الصوفية )

والقبر الثانى ها قبر تخيل مين ؟

انه قبر 

✍️محمد بن الحنفية بن علي بن ابي طالب ( آه و الله)

✍️تعالى نقرأ لهم الفاتحة وهنكمل مشي هاتلاقي بره كده على يمينك قبة مكتوب عليها ضريح الشريفة فاطمة حسن الأنور خد نفسك شوية و كمل مشي على يمينك برضك هاتلاقي مسجد سيدي عقبة بن عامر الجهني

( كل دول أسيادنا من السلف الصالح خللي بالك)

هااا الحمد لله وصلت ؟

✍️شايف بقى الضريح ابو قبة الكبير ده اللي في نص المسجد ؟

سيبك منه دلوقتي لان ( الموضوع كبير ) و كمل لحد الباب الخلفي للمسجد هاتلاقي مربع متر في متر مدهون دهان أخضر تعبان قوي موجود عالارض عدل لا يا جميل ده مش مصطبة بلدي بتاعة واحد غلبان عشان سيادتك تقعد و تأنتخ عليها

ده بقي و يا عارنا المخزي يبقي قبر سيدي و سيدك و سيدنا وسيد مصر كلها الكبير عمرو بن العاص "

ياعم الشيخ هو سيدنا عمرو مش مدفون فى مسجده ؟

لا يا سيدي مش مدفون في المسجد اللي في مصر القديمة زي ما كنا فاكريين طب ليه مفيش قبة ومحدش يعرف مكانه؟

لان تم تهميشه بشكل مبالغ فيه ايام الفاطميين و اكيد عارفين ليه الفاطميين الشيعة بيكرهوا سيدنا عمرو بن العاص .. 

والحمد لله استعصت مصر واستعصمت بنور الله ولم يفلح فيه المذهب الشيعى قط لا قديما ولا حديثا ً 

بفضل الله ثم بفضل منهج الاكابر فى الأزهر .

المقوقس كان ماشي مع عمرو بن العاص مرة فقالوا ان المقطم بيطلع فيه شجر من الجنة و انه مكان طاهر و سيدنا عمر بن الخطاب وصى بدفن المسلمين فيه .

🌹تعالى نخرج بره ونروح الجهة الأخرى القرافة الكبرى 

✍️بص كدا دا مشهد الإمام الشافعي والملك العادل وقايتباي و خلفاء المماليك والعباسيين والفاطميين و المقريزي وابن عطاء الله والإمام الشاطبي أشهر من جمع قراءات القرآن على مقربة منهم و كل اللي ودنك سمعت عنهم من قبل

اتفرج ومتع نظرك وغزى روحك واتعلم ان مصر فيها سياحة اسلامية لو أوليناها اهتمام هتجيب لنا أضعاف السياحة الفرعونيّة 

وعلم ولدك ان مصر بها الصحابة ولاذ بها اهل البيت فأجارتهم وبها اكابر علماء المشرق والمغرب 

عليهم سحائب الرحمات تترى 

طب هو ينفع الأزهر يأكل على موائد هؤلاء العظماء ولا يُليهم اهتماماً ؟!