يبقى بحبك

يبقى بحبك

أيوووه بحبك

لا خايف من كلام الناس 

ولا نظراتهم بتشغلني

ولو بيني وبين نفسي

وبعلو صوتي وبهمسي

هقولك بحبك 

ولو حواليا كل الناس

هقولها بصدق وبإحساس

أيوووه بحبك

ولو كل اللي باقي 

مابيني وبينك دقيقة

هتبقى الحقيقة

إني بحبك

وليه أحبس بقلبي كلمة

تقدر تسعد قلبي وقلبك

مادام القلب حس بحبك

هقولك بحبك

لا عمري بخبي ولا بخجل

ولا بعرف أداري ولا بتقل

وزي ما كتبت 100 غنوة

عن الهم وعن الأحزان

وزي ما عشت العمر كله

بقاسي المر والحرمان

هسيب الماضي وأنسى زمان

وهمسح دمعي والأحزان

وأقربلك كمان وكمان

وهنسى الدنيا وافتكرك

وكل اسم ف حياتي يكون اسمك

وهرسم حبي على بابك

واسخّر قلبي وعيني وحلمي اللي جاي

يكونوا حراس على اعتابك

وهسهر واسهّر عيوني في حبك

وأول ما أشوفك

هقولك .......بحبك 

ده أنا اللي عشقت 100 مرة

ولا عمري فرحت ولا مرة

رماني زماني ع الجاهل

وع الكداب وع الخاين

رميت قلبي على ناس ماهيش ناس

لا ليها أصل ولا مبدأ ولا أساس

لاعرفتْ يوم تصون كلمة

ولا فهمتْ يوم معنى الإحساس

قلوب تدق عشان تكدب

وعيون بتبكي عشان تخون

غدر وخيانة كدب وإهانة

بشر لا ذمة ولا أمانة

ويقولك ناس

ولو دورت مابين الناس

ولو كشفت جوه القلوب

تلاقي الوصف ليهم مكتوب

قلوب تحت المداس تنداس

وبعد اللي شوفته كتير قبلك

وبعد اللي قاسيته من قبلك

وعايزة لما أنا أقابلك

مقولش بحبك ؟

ده أنا هقولها واعيد فيها

وهحفظها وأغنيها

وتبقى غنوة الناس تغنيها

ويعرف كل اللي حواليا

وكل القريب وكل البعيد عني وعنك

إني بحبك