نفس الحلم اللي بشوفه يوماتي
مش سامع فيه غير بس آهاتي
في حياتي أنا عمري ما كنت بخاف
في الحلم ده بس أنا دايما خايف
أول ما بغمض عيني ألاقيني
مسافر لوحدي في قطر كئيب
ناس مش عارفها ولا حاسسها
وزحمة القطر وشكله غريب
ناس نايمة وناس هايمة
وناس سرحانة في هم تقيل
ملامحهم مش زي ملامحي
لهجتهم فيها عنف عجيب
والله غريب القطر وناسه
صوت القطر لوحده كئيب
بيفكرني بصرخة ميت
بيموت تاني من التعذيب
يصرخ قطر الحزن وقلبي
من خوفه بيتهز ف جنبي
قاعد بتلفت حواليا
ونفسي أنام زي النايمين
أو حتى أتوه زي التايهين
وأخيرًا غمضت عنيا
وسكت الصوت من حواليا
ولقيتني لوحدي ف شارع ضلمة
وف آخره بنت جميلة بتضحكلي
حسيت بالراحة في ضحكتها
وخوفي رااااح من نظرتها
بس أنا خايف أقرب منها
بسأل نفسي كمان مش فاهمة
بنت جميلة تعيش ف الضلمة ؟؟؟
يمكن جن ولا شبح
ويكون قلبي بالوهم فرح
بس اخترت إني أأقرررب
حاسس بالخوف .........
بس هجرررررب
مديت إيدي بحب ولهفة
وقربت منها وأنا فرحان
مسكت ايدي وقامت واقفة
ولقيت الشكل بيتغير
نظرة عيونها دي تحيّر
واختفت الضحكة في ثواني
والشكل بقى شكل تاني
ولقيتني خايف من نظرتها
مهزوزة إيدي اللي ف إيدها
عايز أجري مش عارف
نفسي أهرب مش شايف
كل اللي حاسه إن أنا
خااااااااااااااااااااااااااايف
بجري ف شارع ضلمة لوحدي
ودموع عنيا سبقاني
وفجأة صحيت مفزوووع
من نومي وجرحي وأوهامي
وصوت القطر اللي قتلني
لسه أنا سامعه ف وداني
2
-2
