ححاول اعلق على الاحداث الاخيرة باقتضاب.

= ترامب لم يكتسح ويكسب الناخبين .. ولكن الناخبين الديموقراطيين لم يذهبوا بسبب سياسة بايدن الى ادت للتضخم وسيل من المهاجرين العابرين للحدود. ترامب اخد تقريبا نفس الاصوات اللى اخدها في انتخابات ٢٠٢٠ اللى خسرها ... ولكن كاميلا اخدت ١٥ مليون صوت اقل من بايدن اللى كسب ترامب في ٢٠٢٠ .. كل القصة هي العقاب الجماعي للناخبين للحزب الديمقراطي بعدم التصويت.

= طب ايه تأثير ترامب علينا .. وبالطبع لا اقصد ملف إسرائيل .. فاسرائيل هي قاعدة عسكرية امريكية لا تتأثر بتغيير اى رئيس مهما كان ديمقراطي او جمهوري .. السياسة ثابتة.

= ترامب كرئيس جمهوري لا يستخدم شعارات الديمقراطية وحقوق الانسان ويفتح قنوات مع المعارضة للضغط على الحكومات (زى ما فعل الرؤساء الديموقراطيين بايدن و اوباما وكلينتون) بل هو يضغط مباشرة بكل بلطجة على الديكتاتوريات العسكرية والعائلات الحاكمة علنا لتحقيق مصالحه (زى ريجان و بوش الاب والابن وترامب نفسه).

= الجانب الايجابي اللى حيؤثر علينا هو انه حيوقف حرب اوكرانيا مما يعني انخفاض اسعار الحبوب والنفط والغاز .. وحيخفض الفائدة الأمريكية مما يعنى تدفق مزيد من الاموال الساخنة (ودى ممكن استغلالها صح لو في ارادة وادارة .. اه والله الاموال الساخنة ممكن تكون خير ) ... وسيتم ردع ايران وبالتالي ردع الحوثيين مما يعنى استعادة معدلات الملاحة في قناة السويس.

= الجانب السلبي هو انه حيستنزف اغلب ثروات الخليج لدعم الاقتصاد الامريكي ... وحيجبرهم كمان على اعادة اعمار غزة ولبنان .. وحيجبر السعودية تطبع مع إسرائيل مقابل ركوب ابن سلمان على العرش .. مما سيؤثر بشده على الدعم الخليجي لمصر اللى للاسف حتفقد كثيرا من المتبقي من نفوذها بالمنطقة بعد ردع ايران وتطبيع الخليج مع إسرائيل.

= الاخطر من ترامب (٧٨ سنة) هو فانس النائب بتاعه ... وهو براجماتي خطير بمعنى الكلمة .. يكفي ان اقولك انه كان ديمقراطي (ومتجوز واحدة من اصول هندية وكانت من كوادر الديموقراطيين) .. تخيل انه لغاية اخر انتخابات بيصف ترامب بانه هت ...لر جديد .. وده محتاج اكتب عنه بوست لوحده لان احتمال كبير ده اللى يكمل الفترة الانتخابية دي.