(بوست شخصي لا يهم الكثيرين)

= لعلها من المرات النادرة اللى اكتب اى حاجة شخصية على صفحتى ... واقسم بالله اني لا اعرف لماذا تجتاحنى رغبة جامحة لكتابة هذا البوست الشخصي .. بل ازيدكم صراحة ... هناك مليون سبب لكى لا اكتبه ولا اعرف سببا واحدا لاكتبه !! 

= لكى لا اطيل عليكم .. وندخل فى الموضوع .. لم تكن نشأتى دينية نهائيا .. ففى طفولتى سافرت مع والدى دولة رومانيا فى بعثته للحصول على درجة الدكتوراة ورجعت على سنة اولى اعدادي .. وهناك بالطبع لم اذهب لاى مساجد ولم اكن اصلي طبعا او حتى اقرأ قران بسبب طبيعة المدارس هناك ... المهم رجعت مصر وكان كل تركيزى التفوق فى الدراسة والرياضة فقط .. كنت بعيدا عن الدين بدرجة كبيرة .. نعم حققت الكثير من التفوق فى كلا المجالين (ساذكر بعضها ليس للتفاخر .. كنت التانى على ثانوية عامة فى الاقليم والاول على كل كليات الهندسة فى مصر وتانى الجمهورية فى لعبة الاسكواش ) .. تقدروا تقولوا انى كنت علمانى الفكر .. من اشد انصار فصل الدين عن الدولة بل كنت اعتقد (سامحنى الله) ان الدين مكانه فقط القلب والمسجد وليس لاظهاره والتفاخر به .. كنت شاب طايش بكل ما تحمله الكلمة من معاني (ربنا يسامحنى يا رب).   

= تحول كل اهتمامى من التفوق العلمى الى التفوق فى البيزنس .. كنت بشتغل معيد وبحضر ماجستير وفتحت شركة مقاولات فى نفس الوقت .. كان يومي يبدأ الساعة 6 ص ولا ينتهى قبل 11 او نص الليل .. الحمد لله نجحت واخدت شغل كتير .. خلصت ماجستير فى سنتين باليوم ... سافرت ميتشجان امريكا احضر الدكتوراة .. تفوقت وخلصت الرسالة فى سنتين .. واخدت سنة منحة مدفوعة بالكامل من الامريكان لانهاء مشروع حقيقي كنا بنفذه فى ميتشجان .. خلصناه وكانت تكنولوجيا جديدة ... نشرت بحثين فى اكبر مجلتين فى العالم .. جالى عرض من جامعة نيفادا ان اشتغل معاهم واسيب مصر .. بعتت لمصر اخد اجازة .. قالوا لى مفيش اجازات ... انت لازم تدفع فلوس السفر والتامين الصحى وكل مليم اتصرف عليك ... جامعة نيفادا وافقت تتحمل كل ده .. والدي الله يرحمه .. قالى "انت ابنى الوحيد ومينفعش تهاجر وتسيبنى مين حياخد عزايا !!" ..  

= المهم رجعت مصر .. سبت البحث العلمى .. واتجهت للبيزنس .. فتحت مكتب هندسي .. وربنا كرمنى واخدت شغل كتير .. المكتب بقى له فروع فى بورسعيد والقاهرة والاسماعيلية والاسكندرية واسوان ... الحمد لله الشغل كتر وبدأت مرحلة اخد شغل بره مصر .. اخدت شغل فى ام درمان السودان ومنها للسعودية ابها والدمام ... وبعدها خدت مشروع تصميم وتنفيذ مدينة سكنية كاملة بالعراق وربنا كرمنا بشغل كتير برة مصر ... باختصار كل شئ كان ماشي زى الفل .. والحمد لله تعالى .. 

= وانا فى السعودية فى سبتمبر 2005 روحت اعمل اول عمرة فى حياتى .. بكيت بمنتهى الحرقة لما شوفت الكعبة ... سجدت فى الحرم واطلت السجود بل تمنيت ان اموت ساجدا امام الكعبة ... حاجات كتير اتهزت جوايا ... لاول مرة فى حياتى حسيت انى متلخبط مش عارف انا عاوز ايه ! مش قادر احط اهداف عشان اجري وراها لاحققها ... قعدت يومين تلاتة مهزوز .. المهم فوقت وبدأت افكر واسال .. "طب وبعدين؟" .. حتعمل كل اللى انت عاوزة طب وبعدين .. حتسيب كل ده وحيرموك فى حفرة ويروحوا .. بدأت اقرا فى المصحف وبدأت اقرب من ربنا شوية بشوية ... بدأت اصلى بس مش ملتزم بكل فرض .. عملت بعدها عشرات العمرات وحجيت مرتين والحمد لله .. التزمت فى الصلاة .. بنيت كذا جامع .. عملت مؤسسة الصالح الخيرية .. فهمت الحياة .. فوقت من الحياة اللى كانت سرقاني. .. عرفت ان الاسلام دين ودولة .. عرفت ان كل مناحي الحياة مربوطة بالدين وبربنا ..   

= النهاردة انا شايف حملة مسعورة من شوية علمانيين (اللى انا للاسف كنت واحد منهم) على الاسلام ... حملة على التراث الاسلامي ... حملة على الازهر ... حملة على الاذان ... حملة على الحجاب .. حملة على كل ما هو اسلامي .. انها ليست حملة على الاديان بل على الاسلام فلا احد منهم يجرؤ يتكلم عن اى دين تانى ولا يطالب بتحديثه او انتقاده او تنقيح تراثه.

= الحملة دى فى البلاد العربية فقط وانا اعرف تماما ما اقول .. فانا سافرت 23 دولة حول العالم .. للاسف وبكل صراحة الحملة دى برعاية او بتغافل بعض الانظمة الحاكمة فى بعض البلاد العربية .. حيث يتم الخلط بين المسلم الملتزم والاخوان .. يتم تصدير صورة الملتحي بانه ارهابي .. والمحجبة انها منكسرة ومقهورة ... الاخوان مشروع سياسي للوصول للحكم وليس دينى .. تجار دين باختصار ... زىهم بالضبط زى تجار الوطنية اللى برضوا كل هدفهم الحكم وبس. .. الاتنين اتكشفوا والناس فاقت وفهمتهم.

= الاسلام مش مجرد دين وعلاقة بيننا وبين ربنا .. لا ده هوية لينا .. ده نمط حياة .. ده اسلوب لتنظيم المجتمعات .. ده حياة كاملة .. يستحق مننا ان نوقف هذة الحملة المسعورة بكل الطرق مهما كلفنا الثمن.