= بص يا سيدي القصة بدأت من سنتين تقريبا لما صرح نائب وزير خارجية دولة جنوب السودان "دينج داو دينج" في مقابلة مع جريدة اماراتية تصدر باللغة الانجليزية اسمها The National عن خطط بلده لانشاء سد على النيل الابيض لتوليد الكهرباء .. وانهم حيعملوه بتمويل ذاتي من عوائد النفط وان وزارة الري بتاعتهم اوشكت على الانتهاء من التصميمات النهائية.

= طبعا لان النيل الابيض بيزودنا بحوالى ١٥% من المياة بتاعتنا (٨ مليار متر مكعب) .. مصر لقطت الرسالة وفهمت ان جنوب السودان عاوزة تلعب معانا نفس لعبة اثيوبيا .. فبعتنا وزير الري بتاعنا للعاصمة "جوبا" واعلن استعداد مصر لانشاء سدين ليهم مش سد واحد وكمان مجانا بقدرة توليد كهرباء ١٠ ميجاوات لكل سد مما يمكن من زراعة ٣٥ الف فدان في منطقة بحر الجبل ولحماية القرى من الفيضانات.. (هما اصلا عندهم مطر لا ينتهي صيف وشتاء ومش محتاجين الري من النيل اصلا) .. المهم اننا اعتقدنا ان القصة انتهت.

= المفاجأة نشرتها مؤخرا صحيفة Nikkei Asia العريقة (ودى يا سيدى اكبر جريدة اقتصادية فى اسيا عمرها 146 سنة وتبع مؤشر نيكاى بتاع بورصة اليابان) .. نشرت عن انهاء شركة صينية تصميمات سد عملاق في دولة جنوب السودان .. السد العملاق سيولد ٢٥٠٠ ميجاوات ويحجز خلفه ١٠ مليار متر مكعب مياة يعنى اكبر من كل الجزء اللى بيوصل لنا من النيل الابيض !  

= الصحيفة اضافت ان البنوك الصينية قدمت عرض مغري جدا لجنوب السودان لتمويل السد بالكامل حتى لا تلجأ للبنك الدولي او امريكا.

= اعتقادي الشخصي ان جنوب السودان بتكرر معانا تجربة اثيوبيا وهما عاوزين يبيعوا لينا المياة او نوصلها لاولاد العم .. 

= دولة جنوب السودان دي عمرها ١٢ سنة فقط ومن افقر واضعف دول العالم .. افاجأك اكتر لما تعرف ان اكبر شريك تجاري لجنوب السودان هو الامارات بحوالي ٣٧% من الواردات ثم تليها الصين .. (من فضلك راجع اللى انا كتبته من سنتين عن النفوذ الاماراتي فى القرن الافريقي والسودان) ..

= انا بكتب البوست ده عشان احذر مسبقا قبل حدوث المشكلة .. يجب ان نفعل شيئا والا نكرر خطيئة اتفاق المبادئ اللى خلانا مجرد متفرجين فى انتظار الملئ الرابع لسد النهضة .. الحلول معروفة ولكن يلزمها ادارة وارادة.