حفيدي العزيز اللى لسه معرفش اسمك .... معرفش انا حكون موجود ولا لأ وانت بتقرأ الرسالة دي اللى انا كتبتها عشان اوضح لك حقيقة الصور اللى حتشوفها والفيديوهات اللى حتسمعها عن حياتنا وايامنا .. بس ححاول اشرحها لك باختصار ... 

= حبيبي ... مصر مكنتش كلها شاليهات الساحل اللى بتتأجر بعشروميت جنية ولا قوائم الانتظار على العربيات BMW .. ولا الفيلا اللى بتتباع ب 100 مليون جنية ولا الحفلة اللى تذكرتها بكام الف جنية. (حتلاقى فى ايامكم ده اللى بيقوله المذيع هيثم احمد موسى والمذيع وائل نشأت الديهي) ..

= وفى المقابل مصر مكنتش برضة صور الناس اللى بتاكل من الزبالة والناس اللى عايشة فى المقابر .. والناس اللى بتشحت فى الاشارات .. ولا الناس اللى بتموت على ابواب المستشفيات ومش معاهم يتعالجوا. (حتلاقى فى ايامكم ده كلام مصعب معتز مطر وصهيب محمد ناصر)

= احنا يا حفيدي العزيز كنا 110 مليون واحد سنة 2022 .. لو 1% مننا بس كان فاحش الثراء دول يبقوا اكتر من مليون واحد ... ودول اللى الاعلام الحكومي بيركز عليهم عشان يبرز اننا كويسين وزى الفل والعيب من الشعب وفى نفس الوقت برضه لو 5% من مصر شديدي الفقر دول يطلعوا بتوع 5 مليون واحد ودول اللى اعلام المعارضة بيرزهم ويطلع الصور بتاعتهم عشان يبين ان الدولة فاشلة وكده 

= الحقيقة اننا زى اى مجتمع فينا الغنى جدا ووفينا برضة الفقير جدا ... الخطأ انك تركز على فئة واحدة وتعممها على كل مصر ... نسبة الفقر سنة 2021 كانت تقريبا 36% حسب الجهاز المركزى للتعبئة والاحصاء واكيد زادت فى 2022 بعد الفشل الاقتصادي الذريع ... الطبقة المتوسطة كانت بتتأكل للاسف على ايامنا ... معرفش هى لسه موجودة على ايامكم ولا انقرضت ... معرفش الديون وصلت لكام على ايامكم ولا الدولار بقى بكام .. بس احب اعرفك ان جدك من سنة 2014 وكل احواله الاقتصادية بتنهار بشدة .. معرفش الانهيار ده انتهى على ايه؟ هل حموت من الجوع ولا حهاجر واسيب البلد؟ ولا حيحبسونى واموت فى السجن؟ انا طبعا معرفش نهايتى .. بس اكيد انت فى وقت قراءتك للبوست ده عرفت اللى حصل لى .. ابقى ادعى لى بالرحمة..

= جدودي لم ينصحونى او يفهمونى وضع البلد ايامهم لانهم كان ماتوا قبل ما اتولد ومكتبوش لى رسالة زى دي ... فلما انا شوفت صور شوارع وسط البلد والباشوات (اللى نشرها كارهي عبد الناصر) قلت مصر كانت سويسرا قبل 1952 .. ولما شوفت صور الحفاة والعراة (اللى نشرها محبي عبد الناصر) قلت مصر كانت جحيم قبل 1952 ... عشان كده قلت افهمك من شاهد عيان للفترة دي .... جدك خالد.