= بعد اول ملو لسد النهضة في يوليو ٢٠٢٠ كان عندنا خوف ان الفيضان يجي منخفض في السنوات التالية وطبعا اثيوبيا حتحجز كل المياة في بحيرة السد وحتبقى مشكلة .. فصدرت التعليمات بتقليل استخدام المياة لاقصى درجة .. ومنع زراعات الارز والقصب وتبطين وتطهير الترع .. كان الهدف ملو البحيرة باقصى قدر ممكن من المياه تحسبا للسنوات القادمة.
= من ستر ربنا ان الفيضان جاء متوسط في السنة دي ... ولكن في السنة التالية مع الملو التاني جاء الفيضان عال .. قلنا خير وبركة وربنا بيحنا .. بس تجاوزنا منسوب ١٧٧،٨٨ متر وده المنسوب اللى لازم نفتح فيه مفيض توشكي لتخفيف الضغط على السد..
= هنا اصبحنا بين خيارين اما نصرف المياة الزياده ونغسل ممر النيل وساعتها حنغامر اننا نخسر المياة دى لو الفيضان جاء منخفض بالسنوات القادمة .. والخيار التاني اننا نحتفظ بالمياة دي لتملأ بحيرة السد (ونملا مفيض توشكي اللى بياخد حوالى ٢٠ مليار متر مكعب) وحتبقى مشكلة كبيرة لو الفيضان جاء عال السنوات القادمة.
= كانت الصعوبة انك لازم تتخذ قرار مصيري يمس حياة الشعب بناءا على احتمالات متعددة فلا احد يعرف حجم الفيضانات في السنوات القادمة (كل اللى عندنا توقعات ) .. ولا احد يعرف قرار اثيوبيا بصرف او حجز المياه طوال السنوات القادمة .. ولا احد كان يعرف متى سينتهى بناء السد اصلا حسب المخطط ام سيتعطل .
= تمت الاستعانة باستاذين افاضل من كلية هندسة القاهرة اللى اقترحوا حل اننا نعمل مجموعة ترع تعمل بمثابة تفريعات لمفيض توشكي تقدر تسحب المياه من ارتفاع ١٥٠ متر فقط وده ممكن نعمله في اى وقت مش لازم يوليو (تحسبا لاحتمال انهيار السد سواء بعد اكتماله او اثناء الانشاء) .. مما يضاعف من سعة مفيض توشكى وحددوا مسار معين للترع يضمن سحب اكبر قدر من المياة للتخزين في المفيض وشحن الخزان الجوفي بالمياه اللى تقدر تزرع بيها
= عشان تتصور حجم المشروع فطول التفريعات المقترحة حوالى ٨٠ كيلومتر بينما قناة المفيض الاصلية طولها ٢٢ كم فقط .. المشروع شمل اعمال صناعية. الهدف كان رفع حجم تخزين المياه من ٢٠ مليار متر مكعب الى ٨٠ مليار متر وزراعة ٢٣٠ الف فدان ..( اكرر بفضل المشروع ده نقدر نستفيد ب ٦٠ مليار متر مياه ودي اكبر من حصتنا السنوية ٥٥.٥ مليار متر مكعب)
= تم اعتماد هذا المشروع وصدر قرار سيادي بتنفيذه فورا وبالفعل تم العمل ليل ونهار حتى الانتهاء منه في ١١ شهر .. ليصبح جاهزا بنهاية ٢٠٢٣
= مش محتاج اقول لكم عن الصعوبات اللى واجهتنا مش حقولكم درجة الحرارة بالصيف .. كفاية اقولكم ان تم تفجير جبل جرانيت بطول ٩ كيلومتر بفرع ٤ .. دى حاجة واحدة بس
= ثم حدث بالفعل هذا العام ما كنا نخشاه .. فجاء فيضان ٢٠٢٥ عالي واثيوبيا ملت بحيرة سد النهضة ففتحت كل البوابات والممر العلوي . وطبعا بحيرة السد العالي مليانه على الاخر فتم فتح تفريعة المفيض على منسوب ١٥٠ متر .. ثم فتح المفيض نفسه على منسوب ١٧٧،٨٨م .. وبذلك تم الاستفادة من كل كميات المياه القادمة من اثيوبيا اللى اغرقت السودان للاسف .. وتم حماية مصر وزراعة مئات الالاف من الافدنة وكلها اتزرعت قمح.
= النتيجة الرائعة دي لما تم مزج علم خبراء الهندسة المدنيين مع انضباط ضباط الهيئة الهندسية مع اوامر صريحة من القيادة السياسية بازالة كل المعوقات .. اتمنى ان يتكرر في كل مشروعاتنا .. حمى الله مصر وشعبها
2
-2
