في سبيعنات القرن الماضي .. زار "تشاوسيسكو" الديكتاتور بتاع رومانيا زميله "كيم ايل سونج" الديكتاتور بتاع كوريا الشمالية ... المهم انهم استضافوا تشاوسيسكو في مبنى البرلمان الكوري الشمالي (صورة ١) ... قصر مبهر رهيب كله رخام في رخام معمول عشان يفرجوا الرؤساء الزوار على شوية الاراجوزات اللى كل وظيفتها تصقف بحرارة للقائد (مع ان نص الشعب بيموت من المجاعة اصلا) ..  

= طبعا تشاوسيسكو انبهر بالقصر وأول ما رجع رومانيا قرر يعمل اضخم برلمان في العالم كله ... طبعا محدش قال له احنا عندنا اصلا مبني برلمان ومش محتاجين مبنى تاني احنا محتاجين مصانع ومزارع ... لان تشاوسيسكو كان بيسجن ويعدم اى صوت بيناقشه اصلا .. هوب هوب وعلى استعجال قرروا يبنوا اكبر مبنى اداري في العالم (صورة ٢). وطبعا اهم حاجة يبقى كله رخام في رخام .. قرروا يحطوا ٢ مليون متر مربع رخام روسشيتا الفاخر (صورة ٣) .. 

= مش مهم اننا نهدم منطقة كبيرة من العاصمة الرومانية ونطرد اهلها ... مش مهم اننا نخصص افخم انتاج المحاجر للقصر حصريا ونوقف التصدير تماما وندفع شروط جزائية ونخسر عملة صعبة ... مش مهم اننا نشغل ٢٠ الف عامل ثلاث ورديات ٢٤ ساعة لمده خمس سنين من ١٩٨٤ حتى ١٩٨٩ في مشروع ملوش اى ستين لزمة ..مش مهم انه حيتكلف اتنين مليار جنية استرليني في وقت كان الشعب الروماني بيموت على رغيف عيش .. مش مهم انه دمر ميزانية البلد اللى اتدمرت بعد الزلزال الشهير (بالمناسبة انا شخصيا كنت طفل في رومانيا ساعتها مع والدى اللى كان بيحصل على الدكتوارة من بوخارست وكنا ساكنيين في الدور التاسع ودي قصة نبقى نحكيها بعدين) .. المهم طبعا تنفيذ حلم الديكتاتور.

= المبنى طبعا دخل موسوعة جينيس كأكبر مشروع في العالم استعمل فيه الرخام. واكبر مبنى مدني في العالم .. واكبر مبنى استعمل فيه الكريستال ... وشوية حاجات ملهاش اى ستين لزمة.

= حتى اليوم لا يزال المبنى غير مكتمل حيث كان تم تنفيذ ٨٠% فقط عند اعدام الديكتاتور الذي لم يشهد افتتاحه وبعدها توقف البناء كذا مرة .. بعد الثورة الرومانية شغلوا المبنى جزئيا واستفادوا من اللى اتبنى وفتحوا المبنى للزيارة وبيقطعوا تذاكر للزوار ومن ايرادها متوقع انتهاء كافة الاعمال كمان ١٠ سنين وليس من ميزانية الدولة.