بص يا سيدى حاحكي لكم القصة باختصار ... من بتاع سنة كده انتخب المهندسون طارق النبراوي نقيبا لهم واسقطوا مرشح النظام (الوزير هاني ضاحي) ... النبراوي ده عشان جاء باصوات المهندسين وحدهم .. فكل ولاءه لهم فقط وبيدافع عن استقلال النقابة ... المهم انه اصدر قرارات مهمة اصطدمت مع مراكز قوية فى الدولة (زى منع المهندسين اللى كانوا اصلا كانوا ادبي او دبلومات ثم اخدوا شهادات من برة مصر من الالتحاق بالنقابة ... و رفض ان شركة يوتن تاخد قرض مما يقلل نسبة النقابة فى الشركة ... ثم طالب بمنع اعضاء مجلس ادارة النقابة من تولى اى مناصب فى الشركات التابعة للنقابة) ... طبعا القطط السمان دول لم يسكتوا بل فتحوا عليه نار جهنم .. خد بالك ميزانية نقابة المهندسين دي بالمليارات ومحققه فائض السنة اللى فاتت وحدها 405 مليون جنية.
= المهم فى الاخر قدموا طلب بعقد جمعية عمومية لسحب الثقة منه .. النبراوي وافق وقال "على بركة الله نحتكم للصندوق واللى حيقرره المهندسون اصحاب الشأن نلتزم بيه".
= الغريب انهم حددوا يوم الثلاثاء 30 مايو لعمل الجمعية العمومية الغير عادية لمناقشة بند واحد فقط وهو سحب الثقة من النبراوي ... الثلاثاء ده يوم عمل عادي وليس يوم اجازة كما جرت جميع الجمعيات العمومية السابقة !!!.. والاغرب انه تم الاصرار على عقدها فى قاعة واحدة فقط فى قاعة المؤتمرات .. خد بالك احنا بنتكلم عن نقابة يزيد عدد اعضاءها عن نص مليون مهندس !
= حشد النظام وحزب مستقبل وطن كل قوتهم بدءا من حشد اتوبيسات مجانية من كل المحافظات واعطاء يوم اجازة للمهندسين العاملين فى المصالح الحكومية فى كل مصر نظير الذهاب للتصويت باتوبيسات مجانية ووجبات .. والتنبية على كل المهندسين العسكريين للذهاب للتصويت.
= وكعادة شعب مصر العظيم عند الاحساس بالخطر ... نزل المهندسين الاحرار للتصويت بعشرات الالاف حرفيا و وقفوا فى طوابير ملهاش اخر بالساعات الطويلة فى عز الحر والشمس للدفاع عن استقلال نقابتهم حتى لما تم ايقاف التصويت بحجة وجود خلل فى السيستم .. المهندسين لم يمشوا بل زادت اعدادهم لدرجة انه تم مد فترة التصويت نص ساعة للزحام.
= وكانت النتيجة رفض ٢٢٤٣٥ لسحب الثقة مقابل موافقة ١٩٥١ فقط يعنى الرفض ٩٢% والموافقة ٨% فقط ... ليس فقط رفض سحب الثقة من النبراوي باكتساح بل رفض الفساد باكتساح .. رفض الهيمنه على النقابة باكتساح ... اعطاءنا كلنا امل جديد اننا احنا اللى صح .. وان كل الغلط ده سيزول ... كل ده تم فى اطار القانون والدستور وبشكل حضاري جدا ... كان هتاف الجميع “النقابة حرة حرة.. إيد الحزب بره بره”.. شكرا مهندسين مصر .. شكرا طارق النبرواي.
----
تحديث :
= مبروك لمهندسين مصر .. مبروك لكل شرفاء الوطن ..
= بعد اجتماع مجلس ادارة نقابة المهندسين مع وزيري النقل والري الفريق كامل الوزير و هاني سويلم ... اللواء حسام رزق وكيل النقابة واللواء يسري الديب امين النقابة يعلنا استقالة هيئة المكتب بالكامل مع بقاء النقيب طارق النبراوي .. عاشت إرادة مهندسين مصر حرة .. احنا الصح .. احنا الحق ..والحق دوما فوق القوة مهما طال الزمن .. بشرة خير ان شاء الله.
2
-2
