عن اثيوبيا

= من بتاع عشرين سنة كنا بنسمع ان شعب اثيوبيا بيموت من الجوع حرفيا .. كانوا فعلا بيموتوا بالملايين في مجاعات متكررة. اثيوبيا كانت مصنفة افقر دولة فى العالم سنة 2000 .. الان اثيوبيا من اسرع الاقتصاديات نموا فى العالم في اخر عشر سنين (معدل نمو سنوي اكبر من 9%) ...  

= اثيوبيا بعد ما كانت بتشحت كل اكلها بقت بتصدر قمح بعد ما نجحت في الاكتفاء الذاتي من المحاصيل الغذائية الرئيسية بما فيها القمح والدواجن واللحوم والخضروات.

= اثيوبيا عندها اكبر واحسن شركة طيران فى افريقيا .. وطبعا سد النهضة اكبر سد في افريقيا (وخليني اصدمك بجد ان ده اول واحد من اربعة سدود عملاقة مزمع انشاءهم سعتهم ٢٠٠ مليار متر مكعب مياة يعنى قد حصتنا في المياة لاربع سنوات كاملة .. مرفق خريطة من وزارة الري والاراضي المنخضة الاثيوبية توضح اماكنهم وممكن انشر لكم تفاصيلهم المنشورة حتى الان لو تحبوا)

= اثيوبيا دخلت موسوعة جينيس بزراعة ٣٥٠ مليون شتلة اشجار في ١٢ ساعة في الف موقع من ضمن مشروع عملاق لزراعة ٦ مليار شجرة حتى ٢٠٢٥. زرعوا بالفعل ٥.٥ مليار شتلة حتى الآن .. الارقام ضخمة ولكنها حقيقية. (احنا دخلنا موسوعة جينيس باعلي ساري علم واطول مائدة افطار واكبر نجفة مسجد).

= اللى يهمنا هنا هو انعكاس كل ده على حياة المواطن الاثيوبي ... اللى معدل دخله السنوي ارتفع الى 1160 دولار حاليا ... بعد ما كان 916 من سنتين .. وكان 715 من اربع سنين (كان متوسط دخل المواطن الاثيوبي 117 دولار فقط سنة 2003) .. يعنى ارتفع متوسط دخله عشر مرات فى اخر عشرين سنة ... (اكرر دخل المواطن اتضاعف عشر مرات في اخر عشرين سنة). فى حين انخفض متوسط دخل المواطن المصري السنوي من 4200 دولار سنة 2022 الى 3200 دولار حاليا.

= الاهم هو خفض نسبة الفقر من 77% سنة 2000 إلى 44% سنة 2011 الى 23% حاليا ... (في حين ارتفعت نسبة الفقر فى مصر من 29% سنة 2020 الى 32.5% سنة 2022 واكيد تضاعفت بعد التعويم الاخير)

= اثيوبيا بتعطى تسهيلات كبيرة للمستثمر المحلى او الاجنبي لو حيصدر للخارج ... اهمها توفير الارض ببلاش .. اعفاء من اي رسوم بما فيها التصاريح .. اعطاء ترخيص مؤقت لبدء الاعمال لحين انتهاء اصدار الموافقات. و إعفاء ضريبي تام لمده 7 سنوات بشرط تشغيل عدد محدد من العمالة الاثيوبية.

= بعد استقلال ارتيريا سنة ١٩٩١ اصبحت اثيوبيا دول حبيسة ملهاش حدود بحرية ... الا انها اتصالحت مع ارتيريا مؤخرا .. ومن شهر اتفقت مع جمهورية ارض الصومال (المنشقة عن الصومال ومحدش معترف بيها) انها تاخد منه ميناء بربرة مقابل اعتراف بجمهورية ارض الصومال .. طبعا الصومال لم تسكت وجاء رئيسها لمصر طلبا لتدخلها بس للاسف مصر لم تفعل شيئا ... في نفس الوقت توجه رئيس وزراء اثيوبيا بالسفر لتركيا طالبا منها الوساطة بطلب مكتوب.

= تدخلت تركيا بالفعل للوساطة حيث انها تملك نفوذ كبير في الصومال (لها قاعدة عسكرية هناك ونفوذ اقتصادي ضخم) .. نجح وزير الخارجية التركي في عقد اجتماع بين وزراء خارجية اثيوبيا والصومال في انقرة من يومين .. واتفقوا على استئجار اثيوبيا لشريط بحري طوله ٢٠ كيلو على المحيط مش بس لاقامة ميناء بل لانشاء قاعدة بحرية اثيوبية بدعم تركي كامل (تركيا تربطها باثيوبيا اتفاقية دفاع مشترك). واتفقوا على توقيع الاتفاق في انقرة في الاول من سبتمبر.. مش محتاج اقول لكم خطورة امتلاك اثيوبيا لقاعدة بحرية على اول البحر الاحمر على امننا القومي وعلى قناة السويس 

= كنت كتبت من اربع سنوات سلسة بوستات عن الوضع في القرن الافريقي .. وتوقعت ما يحدث الان حرفيا وقدمت حل مقترح لازمة سد النهضة ..