قبل ما تهاجم صلاح اسأل نفسك :
= هل فريقك افضل من فريق السنغال؟
= كنت حتعمل ايه فى كاس العالم غير انك حتتغلب التلات ماتشات وترجع تانى؟ .. انت نسيت كاس عالم روسيا .. ولا البطولة العربية ولا اخر امم افريقيا؟ ولا البطولة اللى قبلها وكانت على ارضك ؟ .. ده انت منتهى احلامك انك توصل لغاية قطر وبس!
= ليه بلد فيها ١٠٠ مليون واحد ومئات الاندية والالاف مراكز الشباب لم تنجح فى اظهار مهاجم واحد هداف (هما اكيد بالالاف بس المنظومة فاشلة فى اظهار اى حد منهم).
= هل ده اتحاد كورة ممكن يخطط لمنظومة كروية ناجحة ولا بس بيقسم السبوبة مع المدربين؟
= هل الناشئين الموهوبة بتاخد فرصتها ولا الامور ماشية واسطة وتوريث زى كل حاجه فى البلد.
= طب قولى حتفوز ازاى وانت مش بتهاجم اصلا؟ .. يا اخي ده انت حتى فى مصر كنت بتدافع ومش عارف تهاجم .. وكل احلامك توصل لضربات الجزاء عشان بركة الدعاء.
= طب هل فى دولة فى العالم كله مانعة جمهورها يحضر الماتشات (تخيل الجمهور بيحضر عادى فى سورية والعراق وليبيا) .. ويوم ما تضطر تدخل جمهور تقوم تنقى الجمهور امنيا ووسايط (جمهور السناكس ومامي فى الكابينت) لانك خايف من جمهور الكورة الحقيقي ليهتف ضد النظام. .. جمهور الكورة الحقيقي اللى بيحرك الصخر هو بس اللى يخلى اللعيبة تاكل النجيلة .. جمهور السناكس كان بيصقف " للاستاذ" سايو مانيه فى قلب استاد القاهرة اللى كان كل الفرق الافريقية مسمياه "استاد الرعب" بسبب التشجيع الرهيب لجمهور الكرة المصري الحقيقي.
= طب هل حد فى مصر كلها مقتنع بكيروش؟ كل الناس بتطالب برحيله من زمان لانه فاشل ورغم ذلك حيتجدد له او حيجيبوا واحد تانى يقاسموا معاه السبوبة.
= تخيل ان كتير من المصريين مزعلوش ان منتخب بلدهم اتهزم !!!! لانهم كانوا خايفين البنزين يغلى عليهم لو كسبوا .. وحياتهم بقت لا تطاق اصلا .. مين السبب فى الكارثة دى .. مين اللى افقد الناس دى الانتماء لبلدهم؟
= حاول تجاوب على الاسئلة دى .. وسيبك منى انا .. بلاش تهاجمنى. انا يا سيدي المرشد العام لجماعة الاخوان وفى وقت الفراغ عميل للموساد. ارتحت كده؟ جاوب بقى على الاسئلة..
2
-2
