قصة الدكتور المهندس الهندي باليغا

بصوا بقى .. اليأس خيانة ... لن نيأس ابدا او نستسلم للواقع المهبب ده .. 

وبرضة لن نكتفى بالنقد فقط .. بل سنقدم الحلول والبدائل ... النهاردة انا قريت ان صادرات الهند من البرامج تعدت 156 مليار دولار سنويا ... (يعنى قد دخل قناة السويس 25 مرة !! ) 

هل تعلم ان كل هذا بفضل راجل واحد بيفهم !! ... نعم مجرد راجل واحد عنده رؤية وفكر ... راجل واحد بيفهم انقذ مئات الملايين من الفقر .. خلينى احكى لكم القصة تانى (كنت كتبتها قبل كده وحفضل اكتبها زى "سلامة" الراجل بتاع واسلاماه اللى كان عمل يحكى قصة جهاد ولم ييأس حتى النصر ) ... لعل وعسى حد يسمع ويفهم ويقلد ... 

= حتى عام ١٩٩٨ كانت الهند تعانى زينا من الفقر والامراض والجهل ... وكان حلم كل شبابها يهاجروا بره ... ساعتها الدكتور مهندس "باليغا" الذي كان شغال رئيس لمؤسسة تطوير الإلكترونيات الحكومية قال (ليه نخلى اولادنا يهاجروا للشركات الاجنبية .. ما نخلى الشركات الاجنبية هي اللى تهاجر عندنا .. تعالوا نعمل مدينة إلكترونية لصناعة تقنية المعلومات) .. مش مجرد يافطة ولقطة فنكوشية ... لا .. الراجل كان عنده خطة حقيقية على مدى ١٠ سنوات لتعليم وتأهيل مليون طالب لتكنولوجيا المعلومات..

= الحكومة وثقت فى باليغا واعطته صلاحيات كاملة .. خصصوا له منطقة كبيرة فى جنوب مدينة بنجالور الفقيرة لتنفيذ "مجمع المدينة" ... الراجل عمل ٧ معاهد تكنولوجية متطورة الحق بها ٥٠ الف طالب متفوق فى اول سنة ... اعطى لكل طالب لابتوب وخط نت مجانا .. بعث ٢٤٠٠ طالب متفوق منهم يتعلموا فى امريكا وانجلترا والمانيا .. اللى رجعوا منهم علموا الباقيين .. واللى استقر فى الخارج بقى يزور مجمع المدينه كل كام شهر وينقل خبراته .. وعشان يشجع الشركات الاجنبية تيجى عنده .. منحهم الارض مجانا وكمان اعفاهم من الضرائب لو شغلوا الف هندي فى كل شركة.. زار بنفسه كل الشركات العالمية الكبرى وعرض عليهم كل المزايا دي.

= نجح المشروع وانتقلت له اكبر 103 شركة تكنولوجية عالمية ( مثل فيربو، هيوليت باكرد، موتورولا، إنفوسيس، سيمنز، آي تي ، ساتيم).. وقام الهنود اتعلموا منهم وانشاؤا حوالي 1500 شركة هندية خالصة لعمل البرامج والكوول سنتر.

= قررت الحكومة الهندية انشاء ثلاث مدن اليكترونية فى مدن هندية اخرى.

الآن مدينة بنجالور وحدها تصدر برامج وخدمات تكنولوجية ب ٣٣ مليار دولار (صادرات مصر كلها من كل شئ فقط ٢٨ مليار دولار) .. مع ان عدد السكان فى مدينة بنجالور تضاعف ٤ مرات فى اخر ٢٠ سنة من ٣ مليون الى ١١ مليون نسمة الا ان متوسط دخل الفرد زاد ١١ مرة ... واصبحت بنجالور مدينة عصرية حديثة جدا.

= لم يقف طموح الهند على ذاك فهى الان تدرب نحو 4 ملايين طالب في 1832 مؤسسة تعليمية متخصصة في التكنولوجيا الحديثة من تقنيات البلازما والنانو والخلايا الجذعية وكل المجالات الحديثة فى العالم لتلحق بركب التطور.

= مفيش طريق تانى للنهوض سوى التعليم .. ده اللى عملته المانيا واليابان فى الستينات واللى عملته الصين فى السبعينات واللى عملته النمور الاسيوية فى الثمانيات واللى عملته تركيا والبرازيل والهند سنة ٢٠٠٠ وتبعتهم اثيوبيا ورواندا فى ٢٠١٠ ... وكل الدول دى نهضت فى اقل من ١٠ سنوات من اصلاح التعليم ... اللهم بلغت اللهم فاشهد. ..