مقارنة بين النساء و الرجال في مصر

اختي المحترمة .. معلش استحمليني .. وحطي نفسك مكان اى شاب او راجل .. طب حطي نفسك مكان ابنك او اخوكي .. وشوفي بيقنعوكي بايه : 

= الراجل يدفع للست مهر لان ده الشرع ولازم يكون مبلغ محترم عشان حيتقال امام الناس ودي قيمتك.

= الراجل يجيب لها شبكة محترمة ولازم تكون غالية عشان حتتصور فيديو ولا ياخدها تانى ابدا مهما اتزنق حتى لو حيتحبس دى مشكلته لوحده.

= مطلوب من الراجل يعمل لها حفلة فخيمة ويجيب لها فستان وميك اب ارتست بمرتبه لسنتين.

= الراجل يؤثث البيت من مجاميعه لان ده الشرع ولو هى جابت اي حاجة يكتب الراجل بيها قائمة اللى حتحبسه بيها طبعا.

= الرجل يجيب الشقة ولازم تكون حاجة محترمة مش اقل من شقة بنت خالة جارتهم.

= الست ليست ملزمة بخدمة الرجل او حتى عيالها ويجب عليه يجيب لها خدامه (اخر فتاوى العصر).

= الست ليست ملزمة بارضاع العيال ويجب عليه يجيب مرضعة (كلام الهلالي).

= الست ليست ملزمة بانفاق مليم واحد فى البيت او على عيالها مهما كانت غنية ومهما كان زوجها فى محنة مالية.

= الراجل ملزم بالانفاق على كل متطلبات زوجتة لان ده الشرع.

= الست تعطيه حقه الشرعي فى الوقت المناسب لها حسب تقديرها ومزاجها بصرف النظر عن احتياجاته والا يبقى حيوان ومش بيقدر تعبها وحالتها النفسية.

= الراجل ليس من حقه الزواج باخرى الا بموافقة الزوجة الاولى ولو عملها يدفع لها غرامة و يتحبس كمان حسب مشروع مقدم للبرلمان.

= انتى عندك مخ زيك زيه ومتعلمة زيك زيه .. مفيش حاجة اسمها طاعة لازم نتناقش فى كل حاجة سوا .. ولو معجبكيش الكلام اقلبيها نكد واضربي له البوز .. لغاية ما يتعود يطاوعك ويتفادى المشاكل.

= لو لم يستحمل الرجل هذا النعيم واضطر يطلقها .. تاخد الست منه الشقة ونفقة متعة ومؤخر وطبعا تسحبه على المحاكم.

= حتطلع عينه فى رؤية العيال ولو ربنا كرمه المحكمة حتحكم له بعد سنوات برؤية العيال ساعتين فى مركز الشباب كل اسبوع مرة .. وكل اسبوع حتمنعهم الست بحجة انهم عيانين او عندهم امتحانات.

= خليكي مكان اي راجل وقولي لى حتعملى ايه؟ بالضبط ده ... حتقولى طبعا "خليها عند امها" ... والنتيجة المنطقية زيادة العنوسة وانتشار الطلاق وعدم زواج المطلقات والارامل وانتشار الزواج العرفي والاخطر هو انتشار الزنا ودمار المجتمعات .. ده اللى حدث فى الغرب ... و ده بالضبط اللى هما عاوزينه يحصل عندنا .. (اقصد الغرب وعملائه اللى عندنا)

= الراجل راجل والست ست .. هما متساويين ولكن ليسوا متطابقين 

Equal but different 

.. ده عشان يكملوا بعض .. ربنا خلقنا كده .. الراجل يشقى برة البيت ويحتوى الست ويحميها ويتكفل بيها .. والست تراعي بيتها وجوزها وعيالها وتطيع جوزها ولا تقف له موقف الند .. لان اى مركب بريسين لازم تغرق .. وبسبب المجلس القومي للمرأة وامثال رضوى الشربيني ارتفعت نسب الطلاق وزادت نسب العنوسة والاطفال بلا مأوى وخربت البيوت .. 

= طبعا لا القى اللوم كله على المرأة وحدها .. فالرجل طبعا يتحمل ايضا بعض المسئولية .. ولكن دوما عمود خيمة الاسرة هي المرأة التى تستطيع الحفاظ على بيتها.

= ملحوظة : الفيمنست اللى طبعا حتخش وتعلق وتقول ذكور مش رجالة وبقية الاسطوانة المشروخة .. يرحمونا بقى لان الاسر اتخربت والمجتمع اتدمر بسببهم .. وكل اللى اتطلقوا ندمانين انهم خربوا بيتهم.