شركاء في الوطن و ليس الدين

= اولا قبل ما اتكلم عن موضوع البوست .. يا ريت تبصوا على اول صورة .. دى صورتى فى الكاتدرائية اثناء حضور قداس عيد الميلاد المجيد بدعوة كريمة من قداسة البابا المحترم تواضروس ... وانا افخر بذلك واحب دائما التواصل مع اخوتى المسيحيين فى الكاتدرائية وعلى قناة مى سات .... فاعز اصدقائى (صديق عمري) رجل مسيحي محترم ولذلك لا باب لاتهامى بالتطرف من اولها كده مليش فيه !

= طب بعد المقدمة دى عاوز تقول ايه يا عم خالد؟ ..بصوا انا نزلت بوست من شوية عن الحجاب .. لقيت داخل يعارضنى "بعض" الاخوه المسيحيين (اكرر كلمة "بعض").. نفس الشئ اما اتكلمت عن التعدد فى الاسلام لاقيتهم بيعارضوا برضو .. !!! حتلاقوهم هما برضوا اللى بيشكلوا اغلبية المعلقين على صفحات جعارة والبحيري وخالد منتصر وناعوت وغيرهم ممن يهاجم اسس الدين الاسلامي .. لا كده كتير الصراحة.

 = بذمتكم عمركم شوفتوا مسلم واحد بس بيتحشر فى امور المسيحيين الدينية الخاصة اللى عليها خلاف ومناقشات حاليا؟ زى القرعة الهيكيلية وجماعة حماة الايمان وطلاق هالة صدقى والخلاف بين انصار متى المسكين وابناء البابا شنودة وقصة فتنة ماكس ميشيل (البابا مكسيموس) ... وغضب الكشافة وانتحار الراهب ... وغيرها الكثير مما نعرف ادق تفاصيله ... ولكننا عمرنا ما اتدخلنا فى شئونهم الخاصة ابدا ولن نهتم او نتدخل ابدا ابدا .. 

= احنا اول ناس حاربنا الاخوان ولكننا لم ولن نحارب الاسلام .. واكتر واحد وقف ضد الاخوان هو انا ... (فى وقت كان اغلب المسيحيين صامتين او بيقدموا على هجرة) واكتر واحد دلوقتي حيقف مع دينه هو انا برضة مهما كلفنى الثمن .. لان الحملة على الاسلام والازهر بقيت اوضح من الشمس ولا ينكرها الا مغرض او متآمر.

= فى كل دين يوجد دوما قلة متطرفيين فمثلا فى الدين المسيحى توجد جماعات KKK فى امريكا وجيش الرب فى اوغندا وانتى بلاكا فى افريقيا الوسطى وغيرها و هى جماعات تنتهج التطرف الديني وتبرره بنصوص من الكتاب المقدس وتفعل نفس ما تفعله داعش من قتل وذبح وحرق باسم الدين (اكرر تعتمد على نصوص من الكتاب المقدس ذات نفسه وليس مجرد تفسيرات متحرفة لابن تيمة صورة 2) ... وهذا مجال لن اخوض فيه الآن لان وجود متطرفين فى اى دين لا يصبغ الدين بصبغة التطرف .. (نفس الشئ فى الدين اليهودى وفى بورما و ... و ... )

= انا زي اي مسلم لابد ان اؤمن بنبوة سيدنا موسي وسيدنا عيسي وكل الانبياء ... ولابد ان اؤمن كمان بالانجيل والتوراة وكل الكتب السماوية ... ولازم اؤمن بمعجزة ميلاد ستنا مريم اطهر نساء العالمين لسيدنا عيسى ... ولابد ان اؤمن بكل معجزات السيد المسيح واذا لم اؤمن بكل ذلك لن اصبح مسلما ... فى حين ان كل المسيحين بينكروا نبوة سيدنا محمد من الاساس... وبينكروا القرآن ككتاب سماوى ... وبينكروا الاسلام كدين اصلا .... ويبقى انا المتطرف !!!

= من الاخر (نحن شركاء وطن ولكننا لسنا شركاء دين) .. فيا ريت كل واحد لا يتدخل فى دين غيره ... وارجو منهم تقبل لوم المحب حرصا على استمرار روابط الاخوة والحب بيننا. خالد