تسمح لي اصدمك بالحقيقة؟

= امبارح فى ناس زعلت من الاعلامي السعودي اللى صرح ان الدوري المصري محلي محدش بيشوفه بعكس الدوري السعودي اللى اصبح متشاف فى 44 دولة ... هو عنده حق ولكنه لم يقل الحقيقة كاملة .. 

= الحقيقة المرة ان مصر فى الفترة الاخيرة تقزمت كثيرا كثيرا ... للاسف مصر فقدت اخر جزء متبقي من ريادتها فى كل المجالات واصبحت مجرد تابعة لدويلات حديثة .. اصبحنا رجل الشرق الاوسط المريض (نفس اللى حصل للدولة العثمانية فى اخر عصرها) .. اللى الكل منتظر سقوطه لينهشوا فيه .. 

= عاوزنى اضحك عليك ولا اقولك الحقيقة ... الريادة المصرية وقوتك الناعمة اصبحتا مجرد سراب وقصص من الماضي بنضحك بيها على نفسنا .. قبل ما تهاجمنى اقرأ الحقائق دى:-

= تقدر تقولى مين اخر مطرب كبير على وزن عبد الحليم وعبد الوهاب وام كلثوم انجبته مصر؟ اللى على الساحة حاليا بتوع مهرجانات.

= تقدر تقولى اخر كاتب كبير على وزن العقاد وطه حسين ونجيب محفوظ ويوسف ادريس وغيرهم انجبته مصر كان امتى؟ مين اصلا موجود حاليا؟

= تقدر تقولى اسم فيلسوف واحد بس موجود حاليا .. اى اسم فيلسوف .. مش على وزن العملاق زكي نجيب محمود؟

= تقدر تقولى اسم رسام واحد موجود حاليا .. اى رسام مش على وزن بيكار وصاروخان وصلاح جاهين؟

= طب اسم شاعر على وزن شوقي ورامي وحافظ وغيرهم؟

= طب كاتب سيناريو على وزن اسامة انور عكاشة؟

= طب مقرئ للقرآن على وزن الشيخ رفعت والطبلاوى والحصري؟ ده المصريين نفسهم بقوا يسمعوا المقرئين السعوديين.

= طب ممثل على وزن المليجي ويوسف وهبي وفاتن حمامة وسميحة ايوب وغيرهم من العمالقة؟

= طب فضائية واحدة تنافس MBC كقناة منوعات او الجزيرة والعربية وسكاي نيوز كقناة أخبار؟

= طب فيلم مصري اتعرض فى اى مهرجان دولي؟

= طب رواية او كتاب لمؤلف مصر اترشح لاى جائزة ابداع عالمية؟

= طب نرجع تانى للكورة .. السعودية اللى انت مش عاوز تقارن نفسك بها واللى بدأت كورة بعدنا بمليون سنة .. وصلت كاس العالم ٦ مرات (يعني ضعفنا) بل وكسبت كذا ماتش (كسبتنا فى روسيا ٢٠١٨) .. بينما احنا لم نكسب اى ماتش فى التلات مشاركات اليتامى بتوعنا على مدار ١٠٠ سنة !!  

= صحفك اليومية اللى كانت بتتقرا من المحيط للخليج بقوا مجرد نشره اعلانية للانجازات فمحدش بيقراها حتى فى مصر (ارقام توزيعها فضيحة) وطبعا مستحيل حتنافس صحف الخليج ولندن.

= تصنيف التعليم بتاعك اصبح مخجل جدا فكيف حتنتج مبدعين؟!!! ... ده على مستوى الجامعات العربية اعلى ترتيب اصبح للجامعات السعودية وحاليا حتنافسها الجامعات القطرية (بعد فتح اكبر جامعات العالم فروع هناك) علما ان نسبة الامية بالخليج اصبحت منعدمة. 

= بعد ما كان مهرجان القاهرة للسينما مهرجان عالمي انزوى الان حتى محليا خلف دبي وطنجة وقرطاج وجدة .. بص على مشاركة الافلام واسماء النجوم العالمية اللى اختفوا من عندنا.

= جواز سفرك بقى ترتيبه العاشر عربيا !!! انا مش حتكلم عن عالميا !!

= شركتك الوطنية مصر للطيران خرجت اصلا من تصنيف افضل 100 شركة على العالم !!!

= مش حتكلم عن وزنك وقوتك عالميا ... شوف اللى بتعمله فيك دولة ممزقة اسمها اثيوبيا .. ولا عن نفوذك عربيا .. انا مش بتكلم عن نفوذك فى العراق ولا سوريا ولا لبنان اللى فقدته تماما .. انا بتكلم عن نفوذك داخل السودان اللى كانت جزء منك !! 

= طب انت اخدت بالك انى لم اتكلم عن نسب الفقر والغلاء والديون وانهيار الجنية لان اقتصادك انهار تماما خلاص .. 

= بص كده على اي مؤشرات عالمية فى مجالات الحرية او الصحافة او مستوى الدخل او السعادة او التعليم او الصحة او منظومة القضاء او اى حاجة ايجابية ... حتلاقى مصر فى القاع او خارج التصنيف اصلا  

= دوما بيكون الاضمحلال شامل .. سياسي اقتصادي فني رياضي اجتماعي اخلاقي ... وكله برضه بينهض مع بعض .. ان شاء الله مصر قادمة .. بس مش بالشعارات والفناكيش .. مصر قادمة بالارادة والادارة .. بناس بتفهم .. بناس وطنية بتحب بلدها .. وانا متاكد اننا راجعين وبقوة وقريبا جدا جدا ... اه حفضل اقول "هانت" ... سامحوني صدمتكم بس دى الحقائق .. اسيبكم بقى عشان المطبلاتية يخشوا يهاجموني انى اخوان وعميل وممول ..