= لو انت معتقد انهم حيعملوا الممر الاقتصادي IMEC بين الهند واوربا عشان ينافسوا قناة السويس بتاعتك وكل مشكلتك ان تثبت ان النقل البحري ارخص من البري .. ارجوك بلاش تقرا البوست ده وارجع كمل نوم..

= لو انت برضة معتقد ان الممر الاقتصادي ده معمول فقط لمكايدة طريق الحرير بتاع الصين .. متضيعش وقتك هنا وانت كده فل الفل.

= حسب تصريحات رئيس هيئة قناة السويس بنفسه ان ايرادات القناة حتتأثر بنسبة 20% فقط .. يعنى بتاع مليار دولار ونص خسارة ... هل تعتقد ان امريكا وكل دول اوروبا والهند واسرائيل والسعودية والامارات والاردن حينفقوا 3000 مليار دولار ويعملوا مشروع بالسنوات عشان يخسروا مصر مليار ونص دولار !!!

= القصة مش نقل شوية حاويات من الهند الى اوروبا ... القصة خلق تكتل اقتصادي جديد عملاق .. خلق مجتمعات اقتصادية متكاملة فيما بينها .. وده اللى اعلنه صراحة بايدن ونيتنياهو وبن سلمان ... طب ايه الحدوته يا عم خالد؟ 

= بص يا سيدي ... IMEC ده اختصار

 India- Middle East- Europe Economic Corridor

الممر الاقتصادي بين الهند الشرق الاوسط واوروبا .. ده بالضبط الغرض منه يجعل الهند والشرق الاوسط واوروبا كتلة اقتصادية متكاملة .. خد بالك هما لما بيقولوا الشرق الاوسط بيقصدوا اسرائيل والخليج .. مصر برة كل حساباتهم ولاسباب حاذكرها البوست الجاى ان شاء الله .. طب ازاي حيجعلوا من الدول دي تكتل اقتصادي ؟ ... حيعملوا ايه ؟ اقولك ان المشروع مش مجرد سكة حديد تشيل شوية حاويات زى ما اعلام السامسونج بيحاول يقلل منه ... المشروع يشمل الاهم من كده بكتير وهما .. 

1- خطوط لنقل الكهرباء الى اوروبا اللى حتتولد فى الخليج (وبالتحديد من الطاقة الشمسية من منطقة نيوم)  

2- خطوط لنقل الهيدروجين الاخضر وهذا هو المستقبل بعد الاستغناء عن النفط خلال عشرين سنة بالاكثر

3- انبوت نفط لشحن نفط الخليج فى انابيب حتى ميناء أشدود ومنه عبر ناقلات النفط حتى اوربا (ودي الخسارة المباشرة اللى قصدها رئيس هيئة قناة السويس) .. وذلك حتى انتشار تكنولوجيا الهيدروجين الاخضر.  

4- والاخطر من كل ده كابلات انترنت فائق السرعة من الهند حتى اوروبا تربط مراكز الذكاء فى مدينة بنجالور فى الهند (اقرا البوست اللى نزلته عنها من سنين فى الكومنتات ) بمثيلاتها بمدينة دبي .. باللى ستنشأ فى منطقة نيوم ... بمراكز الهاي تك بمدينة حيفا الاسرائيلية .. ثم اوروبا .. وده اهم ما فى المشروع ... ربط العمالة الهندية المدربة الرخيصة بالاموال الخليجية بالتكنولوجيا الاسرائيلية والاوروبية .. 

= هذا التكتل الاقتصادى الذى ترعاه امريكا بنفسها وتشارك فيه كل اوروبا والخليج والهند واسرائيل ... اهدافه متعددة اهمها تخلص اوروبا من مصادر الطاقة الروسية ... وتقليل الاعتماد على البضائع والعمالة الصينية الرخيصة باستبدالها بالهندية .. والاهم من كل ذلك تحقيق ارباح بمئات المليارات سنويا ... وتنمية مستدامة لدول التكتل.

= تركيا ادركت اهمية وخطورة المشروع وانه المستقبل وقررت الانضمام له بكل الطرق ... طبعا اردوغان راجل سياسي وسينجح فى ذلك بكل الاساليب البراجماتية ... واليوم اعلن بوتين شروط لبدء مفاوضات انهاء حرب اوكرانيا .. بعد ان ادرك ابعاد هذا التكتل الذى سيقضي على كل اوراق ضغطه على اوروبا ..