= في كار المقاولات ... يلجأ البعض اثناء انشاء المشروع انهم يجيبوا كاحول يحطوا المشروع باسمه فتيجي كل المخالفات باسمه .. وهو عادة مش فارق معاه اصلا .. المهم انه ياخد قرشين ... طبعا بتجيب واحد تقدر تسيطر عليه بالورق وخلافه .. اتذكر انى عملت قرية سياحية في الساحل الشمالي لمجموعة مليارديرات وكان كل الورق باسم واحد لم اراه الا مرة واحدة بعد اكتمال المشروع ساعة نقل الملكية للملاك الحقيقين .. كان الكاحول ده بيشحت مننا سجاير بجد. 

= الكاحول دوره بينتهي بنهاية الغرض من وجوده او لو الملاك الحقيقين قرروا انهاء المشروع سواء برغبتهم او ان في حيتان اكبر منهم ارغمتهم على كده.

= القصة دي بتتعمل بصورة اكبر في حالة غسيل الاموال ... يقوم تاجر المخدرات او الاثار او المسئول الفاسد يجيب واحد كاسرين عينه وماسكين عليه كل حاجة ممكنة .. يقوموا يكبروه ويطلعوه انه شاب مكافح وممكن يعطوا له كمان شوية القاب زي "فخر المش العارف ايه" ويعملوا له بيزنس بالمليارات ويسموه "قصر اللى مش عارف ايه" ولا "بحليب" او اى اسم من اللى كلكم عارفينها .. القصة دى دوما بتنتهي في حالة القبض على الفاسد او ازاحته عن الصورة او ارغامه على ذلك من حيتان تانية. ساعتها بيبعد الكاحول عن الصورة تماما لانه يعلم انه صراع حيتان وهو غير مقصود وان اللى مشغله هو المطلوب القضاء عليه او مجرد قرصة ودن حتى يتم بالاجبار عقد اتفاق بين الحيتان.

= في صراعات الحيتان لا تتعاطف مع كاحول