= اكبر مشكلة تواجه مصر دلوقتى مش الانهيار الاقتصادي .. لان دى فترة ولازم حتعدي.
= ولا تكميم الاصوات واعلام الصوت الواحد والحبس لان الحرية جاية جاية .. ده تطور طبيعي مرت بيه كل شعوب العالم ومفاضلش الا منطقتنا فقط.
= ولا بيع اصول البلد للامارات (ومن وراء الإمارات) .. لان كل ده حتما حيرجع فى المستقبل حتى تيران وصنافير حيرجعوا بلا ادنى شك ..
= والحكم المدني جاي جاي .. اللى احنا فيه ده مرت بيه شعوب اوربا الشرقية وكل دول امريكا اللاتينية والفلبين وتركيا واندونيسيا وكوريا الجنوبية واسبانيا وكتير من دول افريقيا كلها تخلصت من الحكم العسكري بزيادة الوعي .. والحمد لله الشعب فاق وفهم.
= فى رائي الشخصي (وممكن جدا اكون غلطان) اخطر ما يواجه مصر هو فقدان الانتماء للبلد. طول ما المصري شايف ان حقه ضايع هيحاول يكبش ويخطف اي حاجه تقع تحت ايده لا هينفع معاه قانون تصالح ولا قانون تعدي علي اراضي زراعيه. نتيجة انتشار الظلم والفساد حتلاقيه يقولك (ما تولع .. ما هى بلدهم .. هي يعني بلدنا؟) ..
= حتلاقي كل الشباب عاوز يهاجر منها ... واللى معرفش يهاجر بجسده حتلاقيه هاجر بنفسيته .. حتلاقيه بيسمع اغاني اجنبية ويشجع فرق اجنبية ويتابع مسلسلات اجنبية فقط .. او يتجه للطرف الاخر المتطرف اللى مش بيؤمن بفكرة الاوطان اصلا وبيقول الوطنية طاغوت العصر.
= حتلاقي نظرة الشباب لجيش بلاده اتغيرت تماما ... من جيش وظيفته يحمى ارض البلد الى مجرد منافس له فى اكل عيشه ومسيطر على كل مناحي الحياة.
= اي خراب اقتصادي او سياسي ممكن يتصلح فى سنوات معدودة (زي دول كتير انا سبق ونشرت تجاربهم) .. ولكن خراب وخواء الانسان للاسف محتاج جيل كامل او اكتر ليتم اصلاحه تاني .. عشان توصل تاني لشعب يقدس قيم العمل والانتاج والاخلاق والوطنية محتاج سنين طويلة تشتغل فيهم على الجيل اللى طالع بتعليم كويس واعلام هادف .. وانت شايف تعليمك واعلامك عاملين ازاي .. هي دى المشكلة الحقيقية من وجهة نظري.
2
-2
