=اكبر خطر يواجه مصر =

= ليس الانهيار الاقتصادي لان دى فترة وحتعدي ان شاء الله .. ولا الاخوان (اللى انتهوا فعليا) .. ولا المؤامرة الكونية ضد مصر كما يزعمون ...

= ولا بيع اصول البلد للامارات (واولاد العم من وراء الإمارات) .. لان كل ده حتما حيرجع فى المستقبل حتى تيران وصنافير حيرجعوا بلا ادنى شك ..

= ولا تكميم الاصوات والحبس لان الحرية جاية جاية .. وازيدك كمان ان الحكم المدني جاي جاي .. اللى احنا فيه ده نفس اللى مرت بيه كل شعوب اوربا الشرقية وكل دول امريكا اللاتينية والفلبين وتركيا واندونيسيا وكوريا الجنوبية واسبانيا وكتير من دول افريقيا وكلها تخلصت من الحكم العسكري بزيادة الوعي ونهضوا جميعا.

= فى رائي الشخصي (وممكن جدا اكون غلطان) ان اخطر ما يواجه مصر حاليا هو فقدان الانتماء للبلد .. طول ما المصري شايف ان حقه ضايع هيحاول يكبش ويخطف اي حاجه تقع تحت ايده لا هينفع معاه قانون تصالح ولا قانون تعدي علي اراضي زراعيه ولا اى قانون. نتيجة انتشار الظلم والفساد حتلاقيه يقولك (ما تولع .. ما هى بلدهم .. هي يعني بلدنا؟) .. 

= والكارثة ان اكبر خطر بتواجه مصر بيهدد اهم جزء منها شبابها .. اغلبهم اصبح مغيب و ساخط ... حتلاقي كل الشباب عاوز يهاجر منها ... واللى معرفش يهاجر بجسده حتلاقيه هاجر بنفسيته. حتلاقيه بيسمع اغاني اجنبية ويشجع فرق اجنبية ويتابع مسلسلات اجنبية فقط .. او يتجه للطرف الاخر المتطرف اللى مش بيؤمن بفكرة الاوطان اصلا وبيقول الوطنية طاغوت العصر.

= الشباب انصرف تماما عن قضايا الوطن وبل قاطع اعلام السامسونج والانتخابات المتظبطة والبرطمان المنبطح والوزراة السكرتارية.

= حتلاقي للاسف نظرة كثير من الشباب لجيش بلاده اتغيرت تماما ... من جيش مهمته المقدسة حماية ارض البلد وشعبها الى منافس له فى اكل عيشه ومحتكر للحكم ..

= اللى فاضل الان من مؤيدي النظام الحالى مجموعة من السيدات الكبيرة فى السن (اللى اهم حاجة لهن هو الامان مش الاقتصاد او الحرية والا يخسرن ابنائهن او احفادهن فى فوضى الشارع) ... او ناس عايشة برة مصر (بتقبض بالدولار او الريال وكل علاقتها بمصر انها فى الاجازات بتمشى على الكبارى وهما رايحين فيلا الساحل) .. او منتفعين من النظام الحالى ودول نسبة لا تذكر اصلا من بين 100 مليون مصري.

= صدقوني اي خراب اقتصادي او سياسي ممكن يتصلح فى سنوات معدودة (زي دول كتير انا سبق ونشرت تجاربهم) .. ولكن خراب وخواء الانسان للاسف محتاج جيل كامل او اكتر ليتم اصلاحه تاني .. عشان توصل تاني لشعب يقدس قيم العمل والانتاج والاخلاق والوطنية محتاج سنين طويلة تشتغل فيهم على الجيل اللى طالع بتعليم كويس واعلام هادف .. وانت شايف تعليمك واعلامك عاملين ازاي .. هي دى المشكلة الحقيقية من وجهة نظري.