انا بحسد الشعب التركي ... ايوة بحسدهم ... شعب حر عنده حرية اختيار رئيسه .. رغم كل اللى قدمه اردوغان للشعب لم يستطيع الحصول على ٥٠% من الاصوات ... يعني اكتر من نص الشعب عاوز تغيير  ..  

= أردوغان حصل على نسبة 49.5% بينما حصل مرشح المعارضة كليجدار أوغلو على 44.89% وحيعيدوا مع بعض تانى كمان اسبوعين وكل الخيارات مفتوحة (توقعى الشخصي زى ما قلت لكم ان اردوغان حيكسب ب ٥٢% .. مجرد توقع)

= وبسبب انها انتخابات حقيقية ... كانت نسبة مشاركة الشعب 88.84% .. ايوة انت متخيل ان تقريبا ٥٤ مليون تركي من اصل ٦٠ مليون ناخب شاركوا ... يعنى الشعب مش سلبي بل بيشارك لما صوته بيتاخد بيه.

= وفى نفس اليوم ولتوفير النفقات عملوا انتخابات برلمانية حقيقية مش مزورة برضة (كل الموضوع اتعمل فى يوم واحد يعنى ٩ ساعات فقط ومفيش واحد قال انه تم اى تزوير او هرج او مرج) .. البرلمان عندهم ٦٠٠ كرسي .. واللى يحصل على اكتر من نص الكراسي هو اللى يشكل الحكومة وبنظام القوائم الحزبية.    

= وعشان الكل عارف ان مفيش حزب حيقدر يكسب اكتر من نص المقاعد قامت الاحزاب بتشكيل ٣ تحالفات قبل الانتخابات هي :

١- تحالف الجمهور من احزاب العدالة والتنمية (بتاع اردوغان) - الحركة القومية - الاتحاد الكبير - الرفاه.

٢- تحالف الأمة من حزبي الشعب الجمهوري (بتاع اوغلو) و الحزب الجيد

٣- تحالف العمل والحرية من حزبي اليسار الأخضر و العمال.

= كانت نتيجة الاحزاب

العدالة والتنمية 267

الشعب الجمهوري 169 

اليسار الأخضر 61

الحركة القومية 50

الحزب الجيد 44

حزب الرفاه 5 

العمال التركي 4 

= وبكده كسب تحالف حزب اردوغان ٣٢٢ كرسي وبقى من حقه يشكل الحكومة بينما تحالف اوغلو حصل على ٢١٣ كرسي والتحالف التالت ٦٥ كرسي.

= رغم ان حزب العدالة والتنمية حصل على ٢٦٧ كرسي وده اكبر عدد الا انه يعتبر خسر ٢٨ كرسي لانه فى الانتخابات السابقة حصل على ٢٩٥ كرسي وده مؤشر على تآكل شعبيته عند الاجيال الجديدة الشابة.

= العادى فى كل العالم دلوقتى ان محدش يعرف نتائج الانتخابات مش بس فى امريكا ولا أوروبا ولا اسرائيل ولا ايران بل فى العديد من بلدان افريقيا مثل اثيويبا ورواندا وجنوب افريقيا والسنغال وغيرها ... وحتما وقريبا مصر ان شاءالله..