بص يا سيدي وركز معايا ...
= كانت مطالب جنوب افريقيا في القضية اللى رفعتها امام محكمة العدل الدولية هما مطلبين اتنين .. الاول عقاب إسرائيل بسبب ارتكابها جريمة الابادة الجماعية ... والمطلب التاني عاجل وهو اجبار المحكمة لاسرائيل على اتخاذ اجراءات فورية لحماية الفلسطنيين.
= دفاع اسرائيل اتبنى على نقطتين الاولى هي عدم اختصاص المحكمة بنظر القضية والتانية ان إسرائيل بتدافع عن نفسها ضد هجمات ارهابية وده حق مشروع وانها لم تقم باي اباده جماعية.
= النهاردة صدر حكم مبدئي عاجل من المحكمة بيقر في اوله باختصاصها في نظر القضية واصدار احكام فيها يعني قبلت الدعوى (ده دحض اول نقطة للدفاع الاسرائيلي) وبيؤيد المطلب التاني لجنوب افريقيا وطالب من اسرائيل تقديم تقرير خلال شهر على الاكثر بكيفية واتخاذ اجراءات لحماية المدنيين.
= طب ماذا عن المطلب الاول لجنوب افريقيا بعقاب إسرائيل بتهمة الابادة الجماعية .. ده اللى حتنظر له المحكمة في الشهور القادمة وحتكون معركة طويلة وصعبة وحينضم لكل طرف دول كتير (طبعا انسى الدول العربية).
= اللى يهمني ان في حكم محكمة تعتبر اكبر محكمة في الكون بتسهيل دخول المساعدات لغزة .. وده اللى لازم نعمله فورا لان اكيد اسرائيل حتقدم في تقريرها نفس الكلام اللى سبق وقالته ان مصر هي المسئولة وحدها عن ادخال المساعدات (ما هو مينفعش يغيروا كلامهم امام نفس المحكمة) ..
= لازم نبعت فورا قافلة مساعدات فيها صحفيين وحقوقيين ومتطوعين غربيين ومستحيل حيقصفوها لانهم حيثبتوا على نفسهم التهمة ... وقبل كده انك لازم تسمح بدخول كل المصابيين من غزة يتعالجوا ..
= الحكم الابتدائي ده عظيم جدا ويجب استغلاله بذكاء .. والا حنتحط للاسف في خانة المتعاونين مع إسرائيل في الحكم النهائي بناء على ادعاءات اسرائيل.
2
-2
